Одил Аҳмедов: Тўп суришни энг кўп орзу қилган жамоам - 'Барселона'. Футбол юлдузи бутсисини 'михга илди'. Ўзбекистон O‘zbekiston yangiliklar

Мустақил Ўзбекистоннинг энг номдор ва "энг зўр" футболчиларидан бири бўлган Одил Аҳмедов ўз қарорини эълон қилди. 34 ёшида футболдан кетишини айтди.

Ўзбекистонлик юлдуз футболчи бунинг ўзи учун "жуда ҳам оғир қарор" бўлганини айтди.

Сабабини эса, "футбол ўйнаш — майдонда борини бериш" бўлгани билан изоҳлади.

Би-би-си Одил Россиянинг бойвачча "Анжи" клубида тўп сурган ва жаҳоннинг манаман деган юлдуз футболчиларини ортда қолдириб, ўша мавсумда ўз жамоасида зўрларнинг зўри, деб топилган бир пайтда у билан суҳбатлашган.

Одилнинг азалий орзуси, ёқтирган лигаси ва тан берган футболчиси билан ҳам қизиққан.

Ундан барча замонларнинг энг зўр футболчиси танловида устунликни кимга берган бўлардингиз - Пелегами ёки Марадонага, деб ҳам сўраганди.

"Би-би-си меҳмони" рукнида уюштирилган ўша суҳбатимиз матнини яна бир бор тўлиғича эълон қиламиз:

Алоқадор мавзулар:

Би-би-си: Одил, илк саволимиз Лондондан, ашаддий футбол ишқибозидан. У киши, "Сиз дунёда энг кучли футбол лигаси деб қайсисини тан оласиз ва нима учун?", деб қизиққан.

Одил Аҳмедов: Энг кучли футбол лигаси деб мен Англияникини тан оламан. Чунки у ерда ҳар бир жамоа иккинчи бир жамоага рақобатчи бўлолади. Мисол учун, Испанияда фақат "Барселона" ва "Реал" бўладиган бўлса, Англияда ҳар бир жамоа ана шундай қудратга эга ва ҳар битта ўйин жудаям қизиқ бўлгани боис, менга Англия чемпионати ёқади.

Би-би-си: Тошкентдан Музаффар эса, "Ассалому алайкум, Одил ака. Мен сизнинг ашаддий мухлисингизман. Саволим қуйидагича: Оврўпонинг топ клубларида ўйнаш имкони бўлса, қайси чемпионат ва қайси клубда ўйнардингиз? Рақобатга бардош бера олишингизга кўзингиз етадими? Жавоб учун олдиндан раҳмат", деб қолибди.

Одил Аҳмедов: Рақобат бор жойда ўсиш бўлади, шунинг учун агар имконият ўзимда бўлганида, Англия ёки Испания чемпионатининг кучли бешлигида ўйнаган бўлардим. Чунки улар футбол энг ривожланган давлатлар. Шу боис, ўзим ҳам бунга ҳаракат қилаяпман. Худо хоҳласа, ўз орзуйимга эришиш ниятим бор.

Би-би-си: Агар битта топ Оврўпо клубини мисол тариқасида оладиган бўлсак, ўйнашни энг орзу қилган клубингиз қайси бири, Одил?

Одил Аҳмедов: Энг тўп суришни орзу қилган жамоам бу - "Барселона".

Би-би-си: Сиз ҳозир тўп сураётган "Анжи" клубида Самуэль Это'О каби футболчиларнинг нархи трансфер бозорида бир неча ўн миллион долларга баҳоланади. Битта футболчига шунча ҳақ тўланишига муносабатингиз қандай?

Одил Аҳмедов: Энди, энг ривожланган спорт тури, менимча, бу - футбол. Футбол ичида юрганим учун ҳам, ўйинчилар олаётган ҳақ ёки уларга тўланаётган пуллар ҳақли бўлса керак, деб ўйлайман. Чунки улар қанча одамнинг кайфиятини кўтаришаяпти, қанча одамга қувонч улашишаяпти. Бу каби футболчилар ҳам шу даражага етишиш учун ўз устларида ишлашган. Шу сабабдан ҳам, уларнинг нархлари шунақа бўлса керак.

Би-би-си: Америкадан Аҳрор эса, "Мусофир юртдаги энг кучли футболчилар орасида тўп суриш бу - жуда ҳам катта ютуқ, деб биламан. Мен кўпроқ ёшларимиз сизнинг изингиздан бориб, халқимизни дунёга танитиш ва юртимизга иқтисодий фойда келтиришларини жуда ҳам хоҳлайман. Бунга эришиш учун сиз уларга қандай маслаҳатлар берган бўлардингиз?", деб сўраяпти.

Одил Аҳмедов: Раҳмат, савол учун. Энг аввало одамда қобилият бўлиши керак. Инсон ўз устида доимо ишлаб, ана шу қобилиятини изга сололса, энг муҳими шу. Чунки футболчининг "ҳаёти" шундоқ ҳам кам. Ана шу қисқа фурсат ичида профессионал бўлиши керак футболчи. Профессионал бўлиб туриб, ўз устида ишласа, доим ўз мақсадига етади. Чунки футболда жудаям катта профессионаллик талаб қилинади. Шунинг учун ҳам футболчи доимо ўз устида ишлаб юриши керак.

Би-би-си: Одил, агар жаҳон футбол оламига назар ташлайдиган бўлсак, бутун дунё тан олган юлдуз футболчилар саноқли бўлади, тўғрими. Сиз дунёнинг энг сара ўйинчиси деб бугунги кунда кимни тан оласиз ва нима учун?

Одил Аҳмедов: Иккита, учта ўзимнинг энг ёқтирган ўйинчиларим бор, булар Испаниянинг "Барселона" клуби ўйинчилари - Хави, Иньеста...Чунки битта жамоанинг юраги ҳисобланади улар. Шунинг учун ҳам мен уларни энг зўр футболчилар, деб тан олган бўлардим. Жудаям ақлли футболчилар, майдонда ўзларини жуда ҳам эркин тутишади. Мисол учун, қанақа рақиб бўлишидан қатъиназар, майдонда нима қилишни билишади.

Би-би-си: Ўз ўрнида, барча замонларнинг энг зўр футболчиси танловида устунликни кимга берган бўлардингиз - Пелегами ёки Марадонага?

Одил Аҳмедов: У пайтлар ёш бўлганмиз, энди. Аммо ҳозиргача интернет орқали томоша қиламан, менга қанақадир Марадонанинг ўйинлари жудаям ёқади. Унинг кўрсатаётган ўйинлари, айниқса, дреблинглари жуда ҳам кучли.

Би-би-си: Одил, токи ўзингиз кўриб, суҳбатдош бўлмагунингизча, жаҳон футболи юлдузлари сиз учун қўл етмас рўёдек туюлади, тўғрими. Мана, бугун сиз улардан кўпчилиги билан ёнма-ён тўп сураяпсиз. Дейлик, Самуэль Это'О ва Роберто Карлос каби юлдузлар сизда қандай таассурот қолдиришди?

Одил Аҳмедов: Энди, улар билан битта жамоада тўп суришнинг ўзи бахт, буни кимлар орзу қилмайди, дейсиз...Барибир, профессионал футболчилар. Улар билан бирга тўп суриш менга жуда ҳам ёқади. Чунки керакли вақтда ўзининг ёрдамини аямайди, ўзининг маслаҳатлари билан ўртоқлашишади. Шунинг учун, шунақа футболчилар билан ёнма-ён тўп сураётганимдан ўзимни бахтлиман, деб ҳисобласам бўлади. Ўзбек футболчилари орасидан ҳам бунақа ўйинчилар етишиб чиқиши мумкин. Худо хоҳласа, чиқади ҳам, фақат одамнинг ўзида ишонч бўлса бўлди.

Би-би-си: Одил, сизда футбол ўйнашга ҳавас уйғотган ва оёққа қўйиб, катта футболга олиб кирган устозингиз ким?

Одил Аҳмедов: Биринчи устозим - Набижон Ҳайдаров бўлганлар, Худо раҳмат қилсин, оламдан ўтиб кетганлар. Ўшалар менинг футболчи бўлишимга жудаям катта ҳисса қўшганлар. Чунки мени катта ёшдаги болаларнинг турнирларига ҳам олиб кетиб, қўшиб, "Сен яхши футболчи бўласан, ўз устингда ишла", деб доим менинг қулоғимга қуйиб келардилар. Шунинг учун мен у кишидан ниҳоятда миннатдорман, нафақат улардан, балки барча устозларимдан миннатдорман. Менинг шу даражага етишимга ҳаммалари ўз ҳиссаларини қўшишган.

Би-би-си: Исмларини ошкор қилмаслигимизни сўраган бошқа бир мухлисингиз эса, "Одил, менинг саволим бир йил олдин бўлиб ўтган Осиё Кубогига алоқадор. Айтинг-чи, австралияликлардан аламли нокаутнинг сабаби нимада? Ўша сийқаси чиққан омаднинг келмаганлигими? Ёки Вадим Абрамовнинг янглиш тактикасими, қаттиқ ҳаяжон ва психологик босимми? Келгусида яна шундай нокаутларга учраймизми? Олдиндан раҳмат", деб қолибдилар.

Одил Аҳмедов: Энди, футболда ҳамма нарса бўлади. Шунинг учун ҳам, менимча, биз ўша ўйинда руҳий жиҳатдан қаттиқ синиб қолдик, бошида биринчи голни қўйворгандан кейин...Чунки биз майдонга фақат ютиш учун тушган эдик. Гол урамиз деб олдинга кетиб қолдик, улар фақат қарши ҳужумда ўйнашди, қанақадир жудаям аламли мағлубият бўлди. Ҳақиқатдан ҳам, кейинги ўйинлар учун бу - бизга жудаям катта сабоқ бўлди. Энди бу каби ҳолатни такрорламасликка ҳаракат қиламиз. Агар Австралия билан ўйнасак, Худо хоҳласа, албатта ўч олишга ҳаракат қиламиз.

Би-би-си: Дубайдан Али эса, "Салом дўстим, сизга саволим шуки, Дубайда "Анжи" ва "Насаф" орасидаги ўртоқлик учрашуви Қарши жамоаси фойдасига ҳал бўлганини қандай баҳолайсиз? Сизнинг жамоангизнинг камчилиги нима эди", деб сўраяпти.

Одил Аҳмедов: Биз Дубайга асосан куч тўплаш учун борган эдик. Тўп билан умуман ишлганимиз йўқ эди. Асосий иш куч тўплаш бўлгани учун ҳам, энди ҳали болалар формада эмас, 10 январда йиғилганмиз, бир ярим ойлик танаффусдан кейин йиғилганимизга икки ҳафтадан сал кўпроқ бўлаяпти. Ҳаммаси ҳали ўз изига тушиб кетади. "Насаф" билан ўйин яхши бўлди, энди барча синаб кўрилди. Мисол учун, "Насаф" ҳам ёмон ўйнамади, яхши жамоа. Бошқа томондан, ўртоқлик учрашувларида ҳар хил натижаларнинг қайд этилиши, мен учун, ғайриодатий ҳолат эмас.

Би-би-си: Асакадан яна бир футбол фанати, "Одил, авваламбор эришган ва эришаётган ютуқларингиз сизга доим ҳамроҳ бўлишини тилайман. Айтинг-чи, терма жамоамиз реал кўз билан қараганда жаҳон мундиалига бора оладими? Ҳал қилувчи босқичда қайси жамоаларни кўришни хоҳлардингиз?", деб қизиққан.

Одил Аҳмедов: Жаҳон чемпионатининг финал босқичига чиқиши учун Ўзбекистон миллий терма жамоасининг барча имкониятлари етарли. Ҳар тарафлама тайёрмиз, деб биламан. Чунки олдингига қараганда, терма жамоамиз анча кучайган, болалар бир-бирини жуда ҳам яхши тушунади. Президентимиз томонидан футболга эътибор, болаларнинг ўзларига бўлган ишончлари ортиб бораяпти. Шунинг учун ҳам, Худо хоҳласа, Ўзбек халқини хурсанд қилиб, жаҳон чемпионатига чиқамиз. Энди, рақибларга келсак, жаҳон биринчилигига чиқиш нияти қўйилгандан кейин, қайси рақиб тушишидан қатъиназар, ўйнашга мажбурмиз ва Худо хоҳласа, мақсадимизга етиб, Ўзбек халқини хурсанд қиламиз.

Би-би-си: Жанубий Кореядан Мадина эса, "Ассалому алайкум. Тўғрисини айтсам, бу ерга келиб, корейсларнинг ўз миллий терма жамоаларига қанчалик ишқибозликларини кўриб, менинг ҳам Ўзбек футболига мухлислигим кучайди. Сўнгги Осиё кубогида сизнинг ва умуман миллий терма жамоамизнинг ўйинларини деярли қолдирмай, жонли томоша қилдим. Энг аввало оилангиз ва маълумотингиз ҳақида иложи борича тўлиқроқ маълумот берсангиз", деб илтимос қилаяпти.

Одил Аҳмедов: Саволингиз учун раҳмат. Наманган вилоятида туғилганман, оилалиман, фарзандларим бор, Худога шукр, ота-онам ёнимда, ака-укаларим, битта кичкина укам ҳам футболчи, "Навбаҳор" жамоасида ўйнайди, мен оилам билан доим фахрланиб юрганман. Наманган вилоятида 30-ўрта мактабда таҳсил олганман. 4-синфгача ўқиганман. Кейин Наманган футбол лицейида уч йил таълим олиб, 1999 йилдан бошлаб, Тошкент Олимпия захиралари коллежида 6 йил ўқиганман. Ўзбекистон Жисмоний тарбия институтини тугатганман.

Би-би-си: Мадина яна, "Акангиз кино оларканлар, умуман Ўзбек киноси ҳақида нима дейсиз? Тўғриси, мен ҳозирги Ўзбек киносида сифатли, маъноли, савияли кинолар бор, деб ҳисобламайман. Ҳаммаси бачкана", деб бу хусусда сизнинг фикрингиз билан қизиққан.

Одил Аҳмедов: Мен ҳам мусофир юртда юрганим учун, ўзимизнинг киноларни жуда ҳам соғинаман, кўриб тураман, бир марта кўрадиган кинолар кўп кинолар. Яна акам ҳақида сўрабдилар, шоу-бизнес оламига ҳақиқатда жуда ҳам қизиқарди, ҳозир киноларда продюссерлик ҳам қилиб турибди, қолгани эса, унинг шахсий ҳаёти, деб биламан.

Би-би-си: Мадина ўз саволларининг сўнггида Ўзбек футболини янада юқорироққа олиб чиқишларингни тилаган...

Би-би-си: Канададан Месси номи остида савол юборган ўқувчимиз эса, "Сиз Facebook ёки бошқа ижтимоий тармоқлардан фойдаланасизми? Facebookдаги фан-клуб саҳифангизни мен очганман. Ҳозир бутун дунёдан 600 дан ортиқ мухлис жамланган ушбу саҳифада. Қачон истасангиз, номингизга ўтказиб бераман. Раҳмат", деб қолибди.

Одил Аҳмедов: Майли, энди, ўзлари юритаверсинлар. Мен интернетни унақа яхши тушунмайман. Шунинг учун ҳам ўзлари бемалол юритаверсинлар. Агар Facebook да ўз саҳифамни очсам, албатта, мурожаат қилиб, балки, танишиб ҳам оларман. Facebook да ўз саҳифамни очиш ниятим ҳам йўқ эмас.

Би-би-си: Жиззахдан Ҳамза эса, "Ассалому алайкум, Одил. Доғистон Россиядаги Ислом марказларидан бири. Шу билан бирга жуда кўп қўпорувчилик амаллари юз беради? Сиз ҳаётингиздан хавфсирамайсизми?", деб сўраяпти.

Одил Аҳмедов: Раҳмат, мени ўйлаганлари учун. Биз асосан Москвада яшаймиз. Ўйиндан бир кун олдин бориб, учрашувни ўтказиб, дарҳол ортга қайтамиз. Шунинг учун Доғистонда умуман бўлмаймиз, десам ҳам бўлади.

Би-би-си: Интернетдаги хабарлардан кўпчилик палов пиширишга уста эканингизни билиб олган. Паловдан ташқари яна қандай таомларни тайёрлашни биласиз, агар сир бўлмаса?

Одил Аҳмедов: Паловдан ташқари, шўрва қилишни биламан, мастава қилишни биламан, қозон кабоб қилишни биламан. Уйдан жуда ҳам ёш чиқиб кетганман. Ўзим овқат қилишга мажбур бўлиб қолган пайтларим бўлган. Шунинг учун ҳам уч-тўртта овқатни пиширишни ўрганганман.

Би-би-си: Одил, Москвада, Доғистонда эканингиз чоғида Ўзбекистоннинг кўпроқ нимасини соғинасиз?

Одил Аҳмедов: Ўзбекистоннинг ҳамма нарсасини соғинаман. Чунки ўзга юртда юрсангиз, ўз юртингизнинг қадрига етаркансиз. Ўзбекистонга самолёт қўнганидан, ҳамма соғинчларим босилади. Шунинг учун ҳам, бир нарсасини алоҳида кўрсатиб беролмайман, лекин ҳамма нарсаси мен учун қадрли.

Би-би-си: Энг сўнггида сизга савол йўллаган мухлисларингизга тилакларингиз...

Одил Аҳмедов: Қайси давлатда бўлишсаям, мен мухлисларимнинг барчасини яхши кўраман. Ҳозир айтиб ўтдингиз Канада, Америка, Жанубий Корея деб,... Ҳамма жойда мухлисларим борлигидан жуда ҳам хурсандман. Уларга энг аввало соғлиқ тилайман. Доимо саломат бўлишсин. Бизга шунақа мухлислик қилиб туришсин, мен ҳам уларни ҳар доим ғалабалар билан хурсанд қилиб юришга ваъда бераман.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek