АҚШ вице-президенти: Украинадаги уруш яқин орада тугамайди

АҚШ вице-президенти Ж.Д. Ванс Fox News'га берган интервьюсида Украинадаги уруш "яқин орада тугамайди", деб таъкидлади.

Ванснинг айтишича, АҚШ маъмурияти олдидаги асосий савол — Россия ва Украина ўртасидаги "олтин ўрталиқни" топиб, уч йилдан ортиқ давом этаётган низони тугатишга қандай ёрдам бериш мумкинлигидир.

Аммо Ванснинг қўшимча қилишича: "(Россия ва Украина) муросага келиши ва бу шафқатсиз, шафқатсиз урушни тўхтатиши керак бўлади".

Унинг бу баёноти Вашингтон Киев билан АҚШнинг келажакда хавфсизлик соҳасида ёрдами эвазига Украинадаги нодир ер ости бойликларидан олинадиган даромадларни бўлишиш тўғрисидаги келишувни имзолагандан сўнг янгради.

Интервюда Ванс Трампнинг Украинадаги урушга нисбатан ёндашувини ҳимоя қилди.

"Албатта, [украиналиклар] бостириб кирилганидан ғазабдалар", деди у. "Аммо бир неча мил ҳудуд учун минглаб аскарларни йўқотишда давом этаверамизми?"

Трамп шу ҳафта Украинанинг сулҳга эришиш учун 2014 йилда Россия томонидан босиб олинган Қримни беришга тайёр бўлиши мумкинлигини тахмин қилди.

Бироқ Украина президенти Володимир Зеленский аввалроқ Украина конституциясига таяниб, Қрим устидан Россия назоратини қабул қилиб бўлмаслигини айтганди.

Пайшанба куни Fox News'га берган алоҳида интервьюда АҚШ давлат котиби Марко Рубио низода яқин вақт ичида "илгарилаш" бўлмаса, Трамп "ушбу масалага қанча вақт ажратиш кераклигини" ҳал қилишига тўғри келишини айтди.

Россия президенти Владимир Путин бу ҳафта 8 майдан бошлаб, Иккинчи жаҳон урушидаги ғалаба муносабати билан уч кунлик оташкесим эълон қилди.

Украина ташқи ишлар вазири Андрей Сибиха эса жавоб тариқасида дарҳол 30 кунлик ўт очишни тўхтатишга чақирди.

Шунга қарамай, икки давлат ўртасидаги тўқнашувлар давом этмоқда.

Пайшанба кечаси Россия дрони томонидан Украина жануби-шарқидаги Запорожега қилинган ҳужум 14 кишининг жароҳат олишига сабаб бўлди, бироқ ҳалок бўлганлар йўқ.

Айни пайтда Москва Украинани Россия назоратидаги жанубий Украинадаги бозорга дрон орқали ҳужум қилишда айблади. Россия расмийларига кўра, бу ҳужумда етти киши ҳалок бўлган ва 20 дан ортиқ киши яраланган.

Киев бу айбловларни рад этиб, ҳужум фақат ҳарбий ходимларга қаратилганини билдирди.

1 май: АҚШ ва Украина фойдали қазилмалар бўйича узоқ кутилган битимни имзолади

Вашингтон билан Киев бир неча ойлик музокаралардан кейин Украина табиий ресурслари бўйича узоқ кутилган битимни имзоладилар. Ҳужжатни Вашингтонда Украина Иқтисодиёт вазири Юлия Свириденко ва АҚШ Молия вазири Скотт Бессент имзоладилар.

Келишув ҳақида билганларимиз

Тафсилотлар устида ҳали ишлашмоқда. Келишув фойдали қазилмаларни қидириш учун инвестиция фондини ташкил этиш ва даромадлар қандай тақсимланишини белгилайди. Юлия Свириденко ижтимоий тармоқларда, бу битимга кўра, Украина лойиҳаларига, хусусан, минераллар, нефт ва газга Ғарб инвестицияларини жалб қилишга ёрдам берадиган реконструкция инвестиция фондини ташкил этилишини билдирди.

Свириденконинг сўзларига кўра, ушбу ресурслар Украина мулки бўлиб қолади ва айнан қаерларда қазиб олиш ишлари амалга оширилишини Киев ҳал қилади. Ҳамкорлик тенг ҳуқуқли, 50/50 асосида бўлиб, битимда Украина АҚШдан қарздор бўлиб қолмаслиги белгиланган. Бунда лойиҳаларга инвестиция ва технологияларни жалб қилиш АҚШнинг вазифаси ҳисобланади.

Битимга кўра, АҚШ Киевга яна ҳарбий ёрдамини давом эттиради, жумладан, ҳаво мудофаа тизимлари ҳам бунга киритилиши мумкин. Фонддан олинадиган даромад ва бадаллар икки давлат томонидан ҳам солиққа тортилмайди. Свириденко шунингдек, шартнома ҳали Украина парламенти томонидан ратификация қилиниши зарурлигини таъкидлади.

Битимнинг сиёсий контексти

АҚШ Молия вазирлиги баёнотида айтилишича, ушбу битим Россияга Трамп маъмуриятининг "озод, суверен ва фаровон" Украинага содиқлиги сигналини беради. Шунингдек, унда Украинанинг глобал хавфсизликка қўшган ҳиссаси эътироф этилади. Мазкур битим АҚШ Президенти Доналд Трамп ва Украина Президенти Володимир Зеленский ўртасидаги бир неча ой олдинги оммавий жанжални ҳам ўз ичига олган кескин муносабатлар давридан сўнг имзоланди. Битимда АҚШ томонидан аниқ хавфсизлик кафолати борми ёки йўқми, ҳозирча номаълум, Зеленский эса айнан шуни истаган эди.

Молиявий жиҳатга келсак, Президент Трамп ушбу битимни АҚШнинг урушга сарфлаган пуллари учун потенциал тўлов сифатида баҳолади ва АҚШ 350 миллиард доллар сарфлаган, деб таъкидлади. Бироқ, BBC Verify таҳлили АҚШнинг ҳақиқий ёрдам миқдори Трамп даъво қилаётган рақамдан анча кам эканлигини аниқлади. Украина ҳисоб-китобларига кўра, бугунги кунда Россия томонидан босиб олинган ҳудудларда 350 миллиард долларлик ресурслар қолмоқда.

Қандай қазилмалар ҳақида гап кетмоқда?

Украина табиий ресурсларга бой деб кўрилади. Расмий Киев ҳисоб-китобларига кўра, бутун дунёдаги нодир қазилмаларнинг тахминан 5 фоизи Украинада жойлашган. Бунга тахминан 19 миллион тонна графит захиралари киради, бу эса Украинани электромобил аккумуляторларида ишлатиладиган ушбу минерал бўйича етакчи беш давлат қаторига қўяди. Украина, шунингдек, сезиларли миқдорда титан ва литий конларига ҳам эга. Украина қурол-яроғ, электроника ва бошқаларда ишлатиладиган нодир ер металларининг катта захираларига эга эканлигини даъво қилса-да, бу даъволар баҳсли ҳисобланади.

Истиқболларга қарамай, муаммолар ҳам мавжуд. Украинанинг тўртдан бир қисми, асосан, шарқдаги уруш вайрон қилган ҳудудлар миналанган деб тахмин қилинади. Бундан ташқари, битимнинг моддий фойдалари вақт талаб этади, чунки бу ресурслар "ўзлаштирилиши керак", уларни тезда қазиб чиқариб бўлмайди.

Россия нима деди?

Россия ҳали битимга тўғридан-тўғри изоҳ бермади. Бироқ, аввалроқ Владимир Путин Россиянинг "янги ҳудудлари"да (босиб олинган шарқий Украинани назарда тутган ҳолда) америкалик ҳамкорларга қўшма лойиҳаларда ресурслар таклиф қилишга тайёрлигини билдирган эди. Путин, шунингдек, Россия Украинага қараганда бу турдаги ресурсларга "анча бой" эканини ва нодир минераллар бўйича АҚШ-Украина битими Россияни унчалик ташвишлантирмаслигини айтган эди.

28 апрел: Путин Украинада уч кунлик оташкесим эълон қилди - Россия сулҳга тайёрми?

Россия президенти Владимир Путин Украинадаги урушда вақтинчалик ўт очишни тўхтатишни эълон қилди.

Кремлнинг хабар беришича, оташкесим 8 май тонгидан бошлаб 11 майгача давом этади. Бу сана Иккинчи жаҳон урушидаги ғалаба кунига тўғри келади.

Баёнотда айтилишича, Путин ўт очишни тўхтатишни "гуманитар сабаблар" асосида эълон қилган.

Бунга жавобан Украина Ташқи ишлар вазири Андрей Сибиха "камидан 30 кун давом этадиган" зудлик билан ўт очишни тўхтатишга чақирди.

Айни дамда, АҚШ Президенти Доналд Трамп икки томон ўртасида сулҳ тузишга ҳаракат қилаётган бир манзарада, Оқ уй Трамп доимий оташкесимни истаётганини маълум қилди.

Россия баёнотида: "Россия Украина томони ҳам бу намунага амал қилиши лозим, деб ҳисоблайди", дейилган.

"Агар Украина томони ўт очишни тўхтатиш режимини бузса, Россия Федерацияси Қуролли Кучлари тегишли ва самарали жавоб қайтаради".

"Россия томони яна бир бор ҳеч қандай шартларсиз тинчлик музокараларини ўтказишга тайёр эканини, бу музокаралар Украина инқирозининг асл сабабларини бартараф этиш ва халқаро ҳамкорлар билан конструктив ҳамкорлик қилишга қаратилганини эълон қилади".

Кремль шунингдек, Пасха байрами вақтида 30 соатлик ўт очишни тўхтатишни эълон қилганди, аммо ҳар икки томон ўшанда ҳам ўзаро жангларнинг камайганини қайд этган бўлса-да, бир-бирини юзлаб бузилишларда айблаган.

Украинада 20 дан ортиқ ўт очишни тўхтатишга уриниш қайд қилинган — уларнинг барчаси охирида муваффақиятсизликка учраган, баъзилари эса жорий этилганидан бир неча дақиқа ўтиб бузилган.

Энг сўнгги оташкесим, Пасха байрами вақтида, фақат жуда чекланган доирада амалга оширилган ва жанглар фақат бироз камайган, ҳар икки тараф бир-бирини келишувни бузишда айблаган.

Бу янги эълон АҚШ Россия-Украина тинчлик музокаралари учун "ҳал қилувчи" ҳафта, деб атаган бир манзарада содир бўлди.

Вашингтон икки томон ўртасида сулҳ тузишга ҳаракат қилмоқда, аммо Доналд Трамп маъмурияти агар ривожданиш кузатилмаса, жараёндан чиқиб кетиш билан таҳдид қилган.

Путин Россия тинчликка жиддий қараётгандек тасаввурни яратишга интилмоқда — айниқса, Украина Вашингтоннинг 30 кунлик ўт очишни тўхтатиш таклифини қабул қилган бир манзарада.

Бу АҚШ президенти Россиянинг Украинага давомли ҳужумларига норозилик билдирганидан сўнг содир бўлмоқда.

Россия 2022 йил 24 февралда Украинага бостириб кирганди ва ҳозирда Украинанинг тахминан 20% ҳудудини, шу жумладан 2014 йилда Москва томонидан аннексия қилинган Қрим яриморолини назорат қилмоқда.

2022 йилдан бери икки томондан ҳам юз минглаб одамлар — уларнинг катта қисми аскарлар — ҳалок бўлгани ёки яралангани айтилади.

25 апрел: Москвадаги суиқасдда яна бир Россия генерали ҳалок бўлди. Видео

Россия ҳуқуқ-тартибот идоралари генерал Ярослав Москалик ҳалок бўлганини тасдиқладилар.

Тергов қўмитаси хабар қилишича, Москва яқинидаги Балашихада маҳаллий вақт билан соат 10:40 да Volkswagen автомобили портлаган.

Оқибатда Россия Мудофаа вазирлигининг Бош Штаби Бош оператив бошқармаси бошлиғи ўринбосари генерал-лейтенант Ярослав Москалик ҳалок бўлган.

Тергов қўмитасига кўра, портлаш қўлбола портловчи модда портлаши оқибатида рўй берган.

Генерал ўлими бўйича жиноят иши қўзғатилган.

Бу охирги беш ой ичида Россия Мудофаа вазирлигидаги иккинчи генералга уюштирилган суиқасд бўлди.

2024 йил 17 декабри куни Москва шаҳридаги ўзининг кўп қаватли уйи подъездидан чиқаётган пайти Россия Мудофаа вазирлигининг Радиация, кмиёвий ва биологик муҳофаза қўшинлари бошлиғи, генерал-лейтенант Икор Кириллов самокатга ўрнатилган портловчи модда масофадан портлатилиши оқибатида ҳалок бўлган эди.

Ушбу суиқасдни ўзбекистонлик уюштиргани ҳақида Россия ҳуқуқ-тартибот идоралари хабар тарқатдилар.

Украина Хавфсизлик хизмати Игор Кирилловга суиқасд учун масъулиятни ўз зиммасига олди.

Мухбирларга кўра, Россия Украинага бостириб кирган 2022 йил февралидан буён 10 Россия генерали ҳалок бўлган.

Трамп Россия ва Украина ҳақида ҳеч нарса билмайдиган Уиткоффга муҳим вазифа топширдими?

Россия: Путин Трампни ўзига оғдирмоқчими - тафсилотлари учун видеомизни томоша қилинг.

25 апрел куни АҚШ Президенти Доналд Трампнинг махсус вакили Стив Уиткофф яна бир бор Россия Президенти Владимир Путин билан учрашуви мўлжалланган.

Ушбу учрашув Оқ Уй, агар тез орада уддасидан чиқилмаса, Россия билан Украинани яраштириш тинчлик музокараларидан чиқиши ҳақидаги огоҳлантириши ортидан бўлади.

АҚШ Давлат котиби Марко Рубио Америка раҳбариятининг Россия-Украина сулҳида доимо банд бўлиб туришдан ҳам бошқа муҳим ишлари борлигини айтди.

Бунинг ортидан Президент Трамп АҚШ музокараларни тарк этиши мумкинлигидан огоҳлантирди.

Трамп огоҳлантиришидан бир кун ўтиб Россия Президенти Владимир Путин насронийлар учун муҳим Пасха байрами куни 30 соатлик ўт очишни тўхтатишга фармон бергани хабарлари тарқалди.

Аммо Украина ҳам, Россия ҳам бир-бирини 18 мартда эълон қилинган 30 кунлик, сўнг 30 соатлик оташкесимни бузишда айбладилар.

22 апрел тунида Россия пойтахт Киевга қилган зарбаси оқибатида камида 12 инсон ҳалок бўлди, уларнинг камида икки нафари болалар эди.

90 одам жароҳатланди.

Жанубий Африка республикасига сафарининг бир қисмини бекор қилган Украина Президенти Володимир Зеленский Киевга ҳужум Шимолий Кореяда ишлаб чиқарилган баллистик ракета билан қилинган бўлиши мумкинлигини айтди.

Одатда Россия Президенти Владимир Путинни танқид қилишдан ўзини тиядиган Президент Трамп Киевга ҳужумни қоралади.

Ўзи ташкил қилган Truth Social ижтимоий тармоғидаги саҳифасида Трамп ҳужум ҳақида, "шарт бўлмаган ва жуда ёмон вақтда қилинган. Владимир, ТЎХТА!", деган пост қолдирди.

Айни пайтда журналистлар дипломатик тажрибага эга бўлмаган Стив Уиткоффнинг нега АҚШ ташқи сиёсатида муҳим шахсга айланганига эътибор қаратмоқдалар.

68 ёшли Стив Уиткофф мутахассислиги бўйича ҳуқуқшунос.

Яҳудий аждодлари бир замонлар Россия империясидан АҚШга кўчиб борганлар.

Олий маълумотга эга бўлганидан кейин Уиткофф 1980 йилларда кўчмас мулк билан шуғулланадиган компанияда фаолиятини бошлаган.

Компания мижозларидан бири кўчмас мулк қуриб сотиш билан шуғулланадиган Доналд Трамп бўлган.

Улар ўша вақтда танишиб дўст бўлиб қолишган.

Иккови бирга голф ўйнаб туришади.

Трампнинг биринчи президентлиги пайти миллий хавфсизлик бўйича маслаҳатчиси лавозимини эгаллаган, аммо бугунга келиб Трампнинг ашаддий танқидчисига айланган Жон Болтон ҳақида фикри сўралганида, Трамп фақат ўзига содиқ, фақат ўзининг айтганини сўзсиз бажарадиган инсонларни ўз командасига олганини айтди.

"Бу нарса на Трампнинг ўзига, на мамлакатга наф келтиради", деди Жон Болтон.

Уиткофф Россия Президенти Путин билан учрашганидан кейин Россия расмийлари қиладиган баёнотларга ўхшаш чиқишлар қилди, бу Украина расмийларини ғазаблантирди.

Улар Уиткоффнинг тинчлик музокараларидан четлатилишини талаб қилдилар.

У на Россияни, на Украинани билмайди, демоқдалар.

Ҳали Трамп сайланмасидан олдин Россия-Украина урушини тугатиш режасини ишлаб чиқиш вазифаси юклатилган Кит Келлог ҳозир кам кўзга ташланади, бу Кремлнинг Вашингтон олдига музокараларга Россия билан "дўстона" муносабатларда бўлган инсонни тайинлаш талаби сабаб бўлган бўлиши мумкинлиги тахмин қилинмоқда.

Аммо бугунги кунда Стив Уиткоффга АҚШ ташқи сиёсатидаги уч муҳим йўналиш ишониб топширилган.

Булар Россия-Украина уруши, Ғазо уруши ва Эрон билан музокаралар.

Вақтинчалик тинчлик учун ўз еридан воз кечиш

Бокс бўйича собиқ жаҳон чемпиони, бугунги Киев шаҳрининг ҳокими Виталий Кличко Би-би-сига интервью берди.

У вақтинчалик тинчлик учун Украина ўз еридан воз кечиши мумкинлигини айтди.

Виталий Кличко ушбу қадамни мажбурий ва вақтинчалик деб атади.

"Сценарийлардан бири - ҳудудни бериш. Бу адолатдан эмас. Бироқ тинчлик эвазига, майли вақтинчаликка бўлса ҳам бу ечим бўлиши мумкин. Вақтинчалик ечим", — деди Виталий Кличко.

Киев шаҳри ҳокими қайси ҳудудлар ҳақида гап бораётганини очиқламади.

Виталий Кличко Украина халқи "Россия оккупацияси"ни ҳеч қачон тан олмайди, деб алоҳида урғулади.

Кличко Украина Президенти Володимир Зеленскийнинг сиёсий рақиби ҳисобланади.

У 12 инсон ўлимига сабаб бўлган Россиянинг Киев шаҳрига ҳужумдан кейин Би-би-сига интервю берди.

23 апрел. Украинага қонли ҳужум – Россия босимини кучайтирдими?

Бу ўтган бир йилча вақт ичида Россиянинг Киевга қилган энг ҳалокатли ҳужуми экани айтилмоқда.

Ҳалокатли ҳужум

Россиянинг Киевга қарши ракета ва дрон ҳужумлари камида тўққиз кишининг ўлимига сабаб бўлди, яна 77 киши яраланди.

Бу июл ойидан бери Украина пойтахтига қилинган энг қонли Россия ҳужуми ҳисобланади.

Мамлакатнинг бошқа ҳудудларига қилинган ҳужумлар 11 та баллистик ракета, 55 та қанотли ракета ва 145 та дронни ўз ичига олган.

Володимир Зеленский Россиянинг сўнгги ҳужумларига жавобан Жанубий Африкага режалаштирилган сафарининг бир қисмини бекор қилди, аммо у президент Рамафоса билан учрашишни режалаштирмоқда.

Бундан олдин, АҚШ Президенти Дональд Трамп Зеленскийнинг тинчлик музокараларига бўлган ёндашувини танқид қилган.

Зеленский Қримда Россия оккупациясини қабул қилмаслигини таъкидлагандан сўнг, Трамп бу изоҳларни "тинчлик музокараларига жуда ҳам зарарли" деб атаган ва Украина президентини "тинчлик ўрнатиш йўлида тўсиқ " деб танқид қилганди.

АҚШ вице-президенти Ж.Д. Ванс, агар Украина ва Россия тинчлик шартларига кўнмаса, АҚШ музокара жараёнидан "чиқишини" маълум қилди. Бу сўнгги пайтларда АҚШ расмийлари айтаётган баёнотларини такрорлайди.

Унинг огоҳлантирувчи баёноти Лондонда ўтказилган музокаралардан сўнг янгради. Ўт очишни тўхтатишни мақсад қилган музокаралар Буюк Британия, Франция, Германия, Украина ва АҚШ расмийлари иштирок этди. Аммо АҚШ давлат котиби Марко Рубио ва махсус вакили Стив Уиткофф ундан чиқиб кетгач учрашувнинг аҳамияти камайди.

Айни пайтда АҚШ диққатни шу ҳафта Москвада ўтадиган музокараларга қаратмоқда. Урушни тўхтатишга қаратилган дипломатик ҳаракатлар сурати ортаркан, Уиткофф Россия президенти Владимир Путин билан тўртинчи марта учрашиши режалаштирган.

Бу орада Украина президенти Володимир Зеленский "дарҳол, тўлиқ ва шартсиз ўт очишни тўхтатиш"ни талаб қилиб чиқди.

"Қотилликларни тўхтатиш — биринчи даражали вазифа", — деб ёзди Зеленский чоршанба куни ижтимоий тармоқда.

Путин Украина билан тўғридан-тўғри музокараларга тайёрлигини билдирди, аммо ҳужумлар давом этмоқда

Янг Тиян

BBC News

Владимир Путин уруш бошланган бери илк бор Украина президенти Володимир Зеленский билан тўғридан-тўғри музокараларга тайёр эканини билдирди. Бироқ, унинг изоҳларидан бир неча соат ўтиб ҳам Россия ҳужумлари давом этди.

Душанба куни Россия давлат телевидениесига берган интервьюсида Путин: "Россия ҳар доим тинчлик ташаббусларини ижобий қабул қилган. Биз Киев режими вакиллари ҳам шундай муносабатда бўлишларига умид қиламиз", — деди.

Кремль матбуот котиби Дмитрий Песков эса Путиннинг сўзларини Украина билан фуқаролик объектларига ҳужум қилмаслик бўйича тўғридан-тўғри музокаралар ўтказишга тайёрлик белгиси сифатида изоҳлади.

Шундай бўлса-да, сешанба куни бутун Украина бўйлаб янги ҳужумлар рўй берди.

Запорожье шаҳридаги кўп қаватли уйга қилинган ҳужумда бир аёл ҳалок бўлди, 20 киши, шу жумладан тўрт бола яраланди.

Шарқдаги Харковда эса маҳаллий ҳокимият сешанба кундузги дрон ҳужумида камида етти киши жароҳатланганини маълум қилди.

Зеленский сешанба куни тушда Одесса, Суми, Донецк ва бошқа жанубий ҳудудларда ҳам ҳужумлар бўлганини айтди. Шунингдек, украин ОАВ Херсон вилоятида ҳам ҳужум рўй берганини хабар қилди.

Душанба кечқурунги ҳужумда Одессадаги беш қаватли тураржой биноси нишонга олинди ва уч киши яралангани хабар қилинди.

Президент Зеленский бу ҳужумларни "қасддан амалга оширилаётган Россия террори" деб баҳолади ва "буни фақат битта буйруқ билан тўхтатиш мумкин" деб таъкидлади.

У шанба кунги қисқа муддатли Пасха сулҳи давомида Украинада ҳаво ҳужумлари бўлмаганини исбот сифатида мисол қилди.

Зеленский бу оташкесимни узайтириш таклифини яна бир бор таъкидлади. У якшанба куни айтган таклифини такрорлаб, 30 кунлик фуқаролик инфратузилмасига қарши узоқ масофали дрон ва ракеталар орқали ҳужумларни тўхтатишни таклиф қилди.

Путиннинг душанба куни кечқурун айтган сўзлари айнан шу таклифга жавоб сифатида талқин қилинмоқда.

Россия ва Украина ўртасида тўғридан-тўғри музокаралар 2022 йил феврал ойидаги кенг кўламли босқиндан сўнг дастлабки ҳафталарда бўлган эди.

Песков "Президент фуқаролик объектларига ҳужум қилмаслик масаласини муҳокама қилиш мумкинлигини айтганида, у Украина томони билан икки томонлама музокара ва муҳокамаларни назарда тутган", — деб таъкидлади.

Зеленский душанба куни кечаси қилган видео мурожаатида Украинага "Москвадан аниқ жавоб керак"лигини айтди — Россия фуқаролик инфратузилмасига ҳужумларни тўхтатишга розими?

У Путин эълон қилган қисқа Пасха сулҳини эслаб, ҳужумларни камида 30 кунга тўхтатишга чақирди.

"Агар Россия бу қадамга рози бўлмаса, бу унинг инсонлар ҳаётини йўқ қилиш ва урушни давом эттириш ниятида эканини исботлайди", — деди у.

Путин эса журналистларга Кремль бу таклифни "таҳлил қилади" деб айтди ва "фуқаролик инфратузилмасига ҳужум қилмаслик таклифи бўйича масалаларни аниқлаш керак", деди.

Россия томони камдан-кам ҳолларда фуқаролик объектига ҳужумни тан олади. Шу ой бошида Суми шаҳридаги фуқаролик биносига Россия ракета ҳужумлари оқибатида 35 одам ҳалок бўлди, 100 дан ортиқ киши яраланди. Путин ушбу ҳужумларни тасдиқлади.

Бу жорий йилда Украинада фуқароларга қарши амалга оширилган энг оғир Россия ҳужуми бўлди.

"Ҳамма яхши билади, қуролли кучларимиз Суми вилоятидаги конгресс марказига зарба берди. Бу фуқаролик иншоатими? Ҳа, фуқаролик объекти," — деди Путин.

"Бироқ у ерда Курск вилоятида жиноят содир этганлар учун мукофот топшириш маросими бўлган", — деб қўшимча қилди у.

Ҳужум пайтида Суми маркази одамларга тўла бўлиб, кўчаларда байрам нишонланаётган эди. Вилоят раҳбари ҳужум вақтида маҳаллий конгресс залида мукофот топшириш маросими бўлгани ҳақида хабарлар тарқалганидан сўнг ишдан олинди.

Украина чоршанба куни Лондонда АҚШ ва Европа мамлакатлари билан музокараларда иштирок этади. Ўтган ҳафта Парижда ўтказилган учрашувда урушни тугатиш йўллари муҳокама қилинган эди.

Зеленский бу музокараларнинг "асосий вазифаси"ни "шартсиз оташкесимни таъминлаш" деб таърифлади.

АҚШ президенти эса шу ҳафта бошида Россия ва Украина келишувга эришишига умид борлигини билдирган. Агар ҳеч қандай илгарилаш бўлмаса, у "тинчлик музокараларида иштирокдан воз кечиш" билан таҳдид қилган эди.

Айрим танқидчилар эса Путиннинг 30 соатлик Пасха сулҳини Кремлнинг пиар ҳаракати, деб баҳолаган. Франция ташқи ишлар вазири Жан-Ноэль Барро буни "Доналд Трампнинг сабр-тоқатини синамаслик" учун амалга оширилган чора, деб айтган.