Бензин тақчиллиги инқирози кучаяркан, Россия ёқилғи импортига тайёрланаяпти
Сурат манбаси, Reuters
Путин Россия бензин инқирозини яширолмаяпти, деб ёзмоқда муҳожиротдаги The Moscow Times веб-нашри.
Россиянинг Ғарбдаги Калининград вилоятидан тортиб Узоқ Шарқдаги Владивостокигача ёқилғи қуйиш шахобчаларида бир ҳайдовчига рухсат бериладиган ёқилғини чеклаш амалиёти бошланди.
Бу чеклов киши бошига 10 ёки 20 литр қилиб белгиланди.
Евроосиё Иқтисодий комиссияси кенгаши октябр ойидан Россияга олиб кириладиган бензин, реактив двигателлар, дизел, кема ёқилғилари ва бошқа ёқилғилар учун божхона тўловини бекор этиш қарорини қабул қилди.
Бунинг сабаби мавсумий эҳтиёж ортиши муносабати билан деб тушунтирилаяпти, муддати 2026 йил 30 июнигача қилиб белгилангани хабар қилинди.
Украина дронларининг Россия нефтни қайта ишлаш заводларига ҳужумлари мамлакатда бензин инқирозини кучайтираяпти.
Энг сўнгги ҳодисалардан бири - Россиядаги энг йирик нефтни қайта ишлаш заводи ҳисобланадиган Ярославлдаги корхонада 1 октябр тонгида чиққан ёнғин бўлди.
Ярославл вилояти расмийлари ёнғин дрон ҳужуми оқибати эмас, деб хабар тарқатдилар, аммо маҳаллий аҳоли қора тутун жуда йирик, баланд бўлганини айтаяптилар.
Шу йил август ойидан бошлаб Украина Россия нефтни қайта ишлаш заводларига дрон ҳужумларини кучайтирди.
Оқибатда бундай заводлардан камида бештаси ёқилғи ишлаб чиқаришни ёки қисман ёки тўлиқ тўхтатишга мажбур бўлгани хабар қилинаяпти.
Россияда 38 та нефтни қайта ишлаш заводи бор.
Шундан 16 таси Украина дрон ҳужумларига дуч келди.
Айримлари қайта-қайта.
Сурат манбаси, .
Оқибатда Россиянинг нефтни қайта ишлаш қуввати айрим кунлари бешдан бир қисмигача пасайиб кетган.
Ёқилғи қуйиш шохобчаларида эса автомобил бензинига навбатлар ҳосил бўлди.
Россия аннексия қилган Қрим ярим оролида ёқилғи қуйиш шохобчаларининг ярми фаолиятини тўхтатган.
Лукойл ширкати Москва шаҳридаги заправкаларида канистрларга бензин қуйишни тақиқлади.
Сентябр ойи ўртасида Россиянинг 21 минтақасида ёқилғи тақчиллиги кузатилди.
Ҳисоб-китобларга кўра, Россиянинг нефтни ёқилғига айлантириш қуввати 17 фоиз ёки кунига 1,1 баррелга тушиб кетган.
Бензин нархлари 2025 йил бошига солиштирганда 40-50 % қимматлади.
Бир ойнинг ичида дизел ёқилғисининг нархи 10 фоиз ошди.
Кузатувчиларга кўра, бутун дунёга нефт ва газ сотадиган Россия раҳбарияти учун ўз мамлакатида ёқилғи инқирози юзага келгани ёқимли нарса эмас.
Ҳукумат муаммони "нефт маҳсулотларининг кичик тақчиллиги" деб таърифлади.
Қатор чекловлар, шу жумладан, йил охиригича Россиядан бензин экспортини тақиқлаш чораларига қўл урилди.
Таҳлилчиларга кўра, бензин инқирози октябр ойи охиригача давом этиши мумкин.
Унгача Беларусдан бензин олиб турилгани ёрдам бераяпти.
Россиянинг кунлик бензин эҳтиёжи 2 миллион тонна деб кўрилади.
Кунлик эҳтиёжнинг 20% ёки 400 минг тонналик тақчиллик юзага келган.
Июл ойида Россия Беларусдан бензин сотиб олишни 36 фоиз кўпайтирган.
Энди кўпроқ бензин ишлаб чиқариб бериши учун Россия Беларусга кўпроқ нефт етказиш ҳақида ўйлаяпти.
Аммо Беларусдан кўп бензин олиб бўлмайди: бу кунига 100 минг тонна атрофида.
Охирги йилларда Россиядан бензин импортини оширган Ўзбекистон 2025 йили Россия бензинига қарамлигини камайтириш чораларига киришган.
Яқинда Ўзбекистон Қозоғистон ва Туркманистондан бензин сотиб олишни кўпайтиргани хабар қилинди.
