’پابندی کے بعد برقینی کی فروخت میں 200 فیصد اضافہ‘

اسلامی طرز کا مکمل تیراکی کا لباس ’برقینی‘ بنانے والی آسٹریلین خاتون کا کہنا ہے کہ پیرس میں برقینی پر پابندی نے اس کی فروخت میں مزید اضافہ کیا ہے۔

اس لباس میں جسے ’برقہ‘ اور ’بکینی‘ کے الفاظ کے امتزاج سے ’برقینی‘ کا نام دیا گیا ہے خواتین کے صرف چہرہ، ہاتھ اور پاؤں دکھائی دیتے ہیں۔

* <link type="page"><caption> کانز کے ساحلوں پر برقینی پہننے پر پابندی</caption><url href="http://www.bbc.com/urdu/world/2016/08/160812_cannes_bans_burkinis_sr" platform="highweb"/></link>

آہدہ زنیتی جو برکینی یا بُرقینی نام کو اپنا ٹریڈ مارک قرار دیتی ہیں کا کہنا ہے کہ ان کے اس لباس کی فروخت میں 200 فیصد اضافہ ہوا ہے۔

سڈنی کی 48 سالہ خاتون کا کہنا ہے کہ تیراکی کا یہ لباس آزادی اور صحت مند زندگی کا ترجمان ہے نہ کہ جبر کا۔

زینتی کا کہنا ہے کہ اس لباس کے بنانے کا بنیادی مقصد مسلمان خواتین کو بھی آسٹریلیا کی ساحلی زندگی میں حصہ لینے کا موقع فراہم کرنا تھا۔

ان کا کہنا تھا ’میں چاہتی تھی کہ میری بیٹیاں بڑی ہوں تو ان کے پاس چیزوں کے انتخاب کی آزادی ہو۔‘

’مجھے فرق نہیں پڑتا اگر وہ بکینی کا انتخاب کرتی ہیں۔ یہ ان کی مرضی ہے۔ اس پوری دنیا میں کوئی مرد نہیں جو ہمیں یہ بتائے کہ ہم کیا پہنیں اور کیا نہیں۔‘

ان کے بقول وہ کسی حد تک فرانس میں برقہ پر پابندی اور اسلام کے پھیلاؤ کی حوصلہ شکنی کی خبروں سے متاثر ہوئی تھیں۔

فرانس کے بیشتر علاقوں میں حکام نے اس لباس پر یہ کہتے ہوئہ پابندی عائد کر دی ہے کہ یہ سکیولرزم کے قانون کے منافی ہے۔

یہ بحث فرانس میں حالیہ شدت پسند حملوں کے بعد زیادہ حساس ہو گئی ہے۔