’ناروے بہترین ملک، پاکستان کی ایک درجہ تنزلی‘
،تصویر کا ذریعہYana Gribovskaya
اقوام متحدہ کے ذیلی ادارے یو این ڈی پی نے سنہ 2015 کے لیے انسانی ترقی کا عالمی اشاریہ جاری کر دیا ہے جس میں ناروے کو رہائش کے لیے دنیا کا بہترین ملک قرار دیا گیا ہے۔
انسانی ترقیاتی اشاریہ دنیا کے 188 ممالک میں اوسطا عمر، تعلیم، آمدنی اور معیارِ زندگی کی بنیاد پر تیار کیا جاتا ہے۔
جمعرات کو اس انڈیکس کے اجرا کے موقع پر اقوام متحدہ نے کہا ہے کہ ’انسانی ترقی کا اشاریہ اس بات پر زور دینے کے لیے تیار کیا گیا ہے کہ کسی ملک کی ترقی کی آخری کسوٹی اس کے لوگ اور ان کی صلاحیتوں کو ہونا چاہیے، نہ کہ اسے صرف اقتصادی ترقی سے ناپا جائے۔
ناروے مسلسل 12 سال سے اس فہرست میں پہلے مقام پر آ رہا ہے۔
تازہ ترین اعدادوشمار کے مطابق ناروے میں لوگوں کی اوسط عمر 81.6 سال ہے جبکہ وہاں کے عوام اوسطاً ساڑھے 17 سال تعلیم حاصل کرتے ہیں۔
فہرست میں ناروے کے بعد بالترتیب آسٹریلیا، سوئٹزرلینڈ، ڈنمارک، ہالینڈ، جرمنی، آئرلینڈ، امریکہ، کینیڈا اور نیوزی لینڈ جیسے ممالک کے نام شامل ہیں۔
،تصویر کا ذریعہBBC World Service
برطانیہ کو 14 ویں مقام پر رکھا گیا ہے جبکہ دنیا کی دو بڑی معیشتیں چین اور بھارت اس فہرست میں بالترتیب 90 اور 130ویں نمبر پر ہیں۔
End of سب سے زیادہ پڑھی جانے والی
بھارت کے علاوہ دیگر جنوبی ایشیائی ممالک میں سری لنکا کو 73 واں، بنگلہ دیش کو 142واں، نیپال کو 145 واں، پاکستان کو 147 واں اور افغانستان کو 171 واں مقام دیا گیا ہے۔
اس سال پاکستان کے مقام میں مزید ایک درجے کی تنزلی آئی ہے تاہم یہاں ہیومن ڈویلپمنٹ انڈیکس کی قدر میں 0.001 کا اضافہ ہو ہے اور اب یہ قدر 0.538 ہے جو بدترین معیار کے قریب ہے۔
انڈیکس کے مطابق پاکستان میں 15 برس یا اس سے زیادہ عمر کے افراد میں بےروزگاری کی شرح 48 اعشاریہ چار فیصد کے قریب ہے جبکہ ملک میں آٹھ کروڑ 30 لاکھ سے زیادہ افراد یعنی ملک کی 45 فیصد سے زیادہ آبادی غربت کا شکار ہے۔
سنہ 2015 کے انڈیکس میں سب سے آخری مقام پر افریقی ملک نائجر ہے جبکہ اس سے پہلے مرکزی افریقی جمہوریہ، اریٹیریا، چاڈ اور برونڈی کو رکھا گیا ہے۔
