فلپائن میں سمندری طوفان، ساحلی علاقوں سے ہزاروں افراد کی نقل مکانی

شمالی فلپائن میں سمندر طوفان کوپّوسے ساحلی علاقوں میں مکانات تباہ ہو گئے ہیں، ہزاروں افراد کو محفوظ مقامات پر منتقل کیا گیا ہے۔ بجلی اور ذرائع آمدورفت کا نظام درہم برہم ہو گیا ہے۔

ملک میں قدرتی آفات سے نمٹنے کے ادارے کے حکام کا کہنا ہے کہ سمندری طوفان سے ساحل کی جانب لہریں 12 فٹ تک بلند ہو گئی ہیں۔

سست رو طوفان اتوار کی صبح سیگران شہر کے قریب لوزان جزیرے سے ٹکرایا ہے۔

امکان ہے کہ کوپو طوفان کی وجہ سے آئندہ تین دن تک تیز بارشیں ہوں گی جس سے سیلاب اور مٹی کے تودے گرنے کے واقعات کا خدشہ بڑھ گیا ہے۔

نیشنل ڈزاسٹر رسک ریڈکشن کی منتظمہ کاؤنسل کے سربراہ الیکزنڈر پاما کا کہنا ہے کہ شمالی مشرقی علاقے سے اب تک دس ہزار افراد کو محفوظ مقامات پر منتقل کیا گیا ہے۔

کوپّو نامی اس طوفان، جو لینڈو کے نام سے بھی جانا جاتا ہے، کے سبب تقریبا 250 کلو میٹر فی گھنٹہ کی رفتار سے ہوائیں چل رہی ہے اور یہ آہستہ آہستہ آگے کی طرف بڑھ رہا ہے، اس کا مطلب ہے کہ اس سے ایک لمبے وقت تک شدید بارشیں ہوسکتی ہیں۔

ہوا بھی اتنی تیز ہے کہ اس سے آسانی سےدرخت اکھڑ سکتے ہیں، عمارتوں کی چھتیں ہوا سے تباہ ہوسکتی ہیں جس سے بجلی کی فراہمی بری طرح متاثر ہونے کا خدشتہ ہے۔

نیشنل ڈزاسٹر رسک ریڈکشن کی منتظمہ کاؤنسل کے سربراہ الیکزنڈر پاما کا کہنا ہے : ’جانی نقصان کم سے کم کرنے کے لیے اب ہم زبردستی ساحلی علاقوں اور دریاؤں کے آس پاس بسنے والے لوگوں کو وہاں سے نکال رہے ہیں۔‘

ان کا مزید کہنا تھا: ’چونکہ ہوا وقت کے ساتھ بہت تیز ہوتی جاری ہے اور طوفان کے پاس آتے ہی یہ بہت تیز ہوجائے گی اس لیے حالات کافی سنگین ہیں۔‘

اندرون ملک بہت سی پروازیں منسوخ کردی منسوخ کر دی گئی ہیں اور جہاز رانی کا عمل بھی پوری طرح سے معطل کر دیا گیا ہے۔ اس دوران جنوبی چین کے سمندروں میں گم ہونے والی کشتی کو تلاش کرنے کی مہم بھی روک دی گئی ہے۔ کشتی پر چار افراد سوار تھے۔

ایزابیلا صوبے کے ایک رہائشی ویر مالا بانا نے خبر رساں ادارہ رائٹرز نے کو فون پر بتایا کہ فوجی ساحلی علاقوں کو لوگوں سے زبردستی نکال رہے تھے۔

ان کا کہنا تھا: ’چار گھنٹے سے شدید بارش اور تیز ہوائیں چل رہی ہیں۔ صوبے میں بجلی بھی نہیں ہے اس لیے خبروں کا پورا انحصار اب ریڈیو پر ہے۔‘

اطلاعات کے مطابق طوفان سے ہونے والی بارش اب دارالحکومت منیلا کا رخ کر رہی ہے لیکن وہاں ہوائیں اتنی تیز چلنے کا امکان نہیں جس سے کوئی خطرہ لاحق ہو۔

اس سے قبل فلپائن کے صدر بینگونو آکینو نے طوفان سے متعلق ٹی وی پر لوگوں کو خبردار کیا تھا تاکہ لوگ محفوظ مقامات پر چلے جائیں۔

سمندری طوفان كوپّو منگل تک فلپائن میں ہی رہنے کا خدشہ ہے اور اس کے بعد یہ تائیوان کی طرف بڑھ جائے گا۔ فلپائن میں یہ طوفان ایسے وقت آیا ہے جب دو سال پہلے آنے والے طوفان سے ہونی تباہی کے بعد سے مکمل طور پر بحالی نہیں ہو پائی ہے۔