مسجد الحرام میں حادثہ، چھ پاکستانیوں کی ہلاکت کی تصدیق

سعودی عرب کے شہر مکہ کی مسجد الحرام میں کرین گرنے سے 107 افراد کی ہلاکت کے واقعے کی تحقیقات جاری ہیں جبکہ سعودی عرب میں پاکستان کے سفیر نے کہا ہے کہ مرنے والوں میں چھ پاکستانی بھی شامل ہیں۔

کرین گرنے کا یہ واقعہ جمعے کی شام دنیا کی سب سے بڑی مسجد کے صحن میں اس وقت پیش آیا تھا جب شدید طوفانِ بادوباراں کے دوران ایک کرین مسجد کی تیسری منزل کی چھت توڑتی ہوئی نیچے آ گری تھی۔

کرین حادثہ تصاویر میں

پاکستان ٹیلی ویژن کے مطابق سعودی عرب میں پاکستانی سفیر منظور الحق نے چھ پاکستانی حاجیوں کی ہلاکت کی تصدیق کرتے ہوئے کہا ہے کہ ان کے ورثا سعودی عرب میں موجود ہیں۔

انھوں نے کہا کہ سعودی حکام واقعے کی تحقیقات کر رہے ہیں۔

پاکستانی سفیر نے مزید کہا کہ اس وقت مکہ کے تین ہسپتالوں میں 36 پاکستانی حاجی زیرِ علاج ہیں، اور ان سب کی حالت خطرے سے باہر ہے۔

سعودی حکام نے اس حادثے میں 107 افراد کی ہلاکت کی تصدیق کی ہے جبکہ زخمی ہونے والوں کی تعداد کم از کم 230 ہے جو اس حادثے میں زخمی ہوئے۔

اطلاعات کے مطابق مرنے والوں میں انڈونیشیا، بھارت، ایران اور مصر کے شہری شامل ہیں تاہم ان ممالک کی حکومتوں کی جانب سے فی الحال اپنے شہریوں کی ہلاکتوں کے بارے میں کوئی بیان سامنے نہیں آیا ہے۔

سعودی عرب کے شاہ سلمان نے کہا ہے کہ اس حادثے کی تحقیقات کے نتائج عام کیے جائیں گے۔

شاہ سلمان نے ہفتے کی رات جائے حادثہ اور ایک ہسپتال کا دورہ کیا جہاں زخمی زیرِ علاج ہیں۔

سعودی عرب کے سرکاری خبررساں ادارے کے مطابق انھوں نے کہا: ’ہم (حادثے کی) تمام وجوہات کی تحقیقات کریں گے اور بعد ازاں نتائج عوام کو بتائیں گے۔‘

سعودی حکام کا کہنا ہے کہ حادثے کے وقت موسم بہت خراب تھا اور تیز ہوائیں چل رہی تھیں جو اس حادثے کا سبب بنی ہیں۔

سعودی محکمۂ شہری دفاع کے ڈائریکٹر جنرل سلیمان ابن عبداللہ العمر نے سنیچر کو کہا ہے کہ کرین گرنے کے واقعے سے کچھ دیر پہلے شہر میں غیر معمولی بارش ہو رہی تھی اور اس کے ساتھ 83 کلومیٹر فی گھنٹہ کی رفتار سے ہوائیں چل رہی تھیں۔

انھوں نے سعودی ٹی وی العربیہ سے بات کرتے ہوئے ان اطلاعات کو مسترد کیا کہ کرین گرنے کی وجہ اس پر آسمانی بجلی کا گرنا بنی۔

سلیمان العمر نے یہ بھی کہا کہ اس حادثے کے بعد بھگدڑ مچنے اور اس میں ہلاکتوں کی اطلاعات بھی بالکل غلط ہیں۔

نامہ نگاروں کا کہنا ہے کہ سعودی عرب کے تعمیراتی مقامات پر موجود حفاظتی اقدامات پر خدشات ظاہر کیے جاتے رہے ہیں۔

ابھی تک تقریبا 10 لاکھ افراد حج کے لیے مکہ پہنچ چکے ہیں جبکہ اس سال حج کے لیے مجموعی طور پر 30 لاکھ سے زیادہ مسلمانوں کی سعودی عرب آمد متوقع ہے۔

خیال رہے کہ حج کے موقعے پر مسجد الحرام میں تعمیراتی کام جاری ہے اور اس کی وجہ مسجد میں مزید زائرین کے لیے گنجائش پیدا کرنا ہے۔

مکہ میں عازمینِ جج اور زائرین کی بڑھتی ہوئی تعداد کی وجہ سے پرانی عمارتوں کے انہدام اور ان کی جگہ بلند و بالا ہوٹلوں اور دیگر کثیر المنزلہ عمارتوں کی تعمیر کا سلسلہ ایک عرصے سے جاری ہے۔

اگرچہ اس عمل کے دوران بہت سے ایسے تاریخی مقامات بھی منہدم کیے گئے ہیں جو پیغمبر اسلام کے زمانے کے تھے لیکن سعودی حکام کا موقف ہے کہ حاجیوں کی بڑھتی تعداد کی وجہ سے یہ اقدامات ضروری ہیں۔

ماضی میں بھی حج کے موقع پر سعودی عرب میں حادثات پیش آتے رہے ہیں۔

سنہ 2006 میں حج کے دوران منیٰ کے مقام پر رمی جمرات کے دوران بھگدڑ مچنے سے ساڑھے تین سو کے قریب حاجی ہلاک ہوئے تھے۔