’پاکستان بھارت سے نتیجہ خیز مذاکرات کا خواہاں ہے‘
پاکستان کے وزیراعظم کے مشیر برائے قومی سلامتی اور خارجہ اُمور سرتاج عزیز نے کہا ہے کہ پاکستان بھارت کے ساتھ نتیجہ خیز مذاکرات کا خواہاں ہے۔
پاکستان کے سرکاری خبر رساں ادارے کا کہنا ہے کہ ملائشیا کے دارالحکومت کوالالمپور میں آسیان کے علاقائی ممالک کے بین الوزارتی اجلاس کے دوران مشیر خارجہ امور نے کہا پاکستان خطے کے تمام ہمسایہ ممالک کے ساتھ اچھے تعلقات چاہتا ہے۔
انھوں نے کہا کہ پاکستان بھارت کے ساتھ کشمیر سمیت تمام تنازعات پر نتیجہ خیز مذاکرات کرنا چاہتا ہے۔
اس سے قبل بھارت نے پاکستان کو تجویز دی تھی کہ دونوں ممالک کے مشیر داخلہ کے درمیان ملاقات کی تجویز دی تھی۔ بھارت نے کہا تھا کہ 23 اور 24 اگست کو پاکستان اور بھارت کے مشیر قومی سلامتی نئی دہلی میں ملاقات کر سکتے ہیں۔
پاکستان کے دفتر خارجہ کا کہنا ہے کہ دونوں مملک کے مشیروں کے درمیان ملاقات کی حتمیٰ تاریخ کا فیصلہ ہونا ابھی باقی ہے۔
یاد رہے کہ گذشتہ کچھ عرصے سے پاکستان اور بھارت کے درمیان تعلقات میں کشیدگی بڑھ گئی ہے اور بھارت نے کشمیر کے علاقے ادودھم پور میں باڈر سکیورٹی فورس کی بس پر حملے اور گرداس پور میں دہشت گردی حملے کی ذمہ داری پاکستان پر عائد کی ہے۔
End of سب سے زیادہ پڑھی جانے والی
دہشت گردوں کے ان دونوں حملوں میں چار مسلح شدت پسندوں سمیت کم سے کم 14 افراد ہلاک ہوئے ہیں اور ایک حملہ اور پکڑا گیا ہے۔
بھارت کے وزیر داخلہ راج ناتھ سنگھ نے ان حملوں کا الزام پاکستان پر عائد کیا تھا جبکہ پاکستان نے حملے کی مذمت کرتے ہوئے کہا تھا کہ ایسی بیان بازی سے دہشت گردی سے نمٹنے کے اقدامات متاثر ہوں گے
کوالالمپور میں آسیان کے 22 ویں اجلاس سے خطاب کے دوران مشیر قومی سلامتی و خارجہ اُمور نے افغانستان میں سیاسی حالات پر بات کرتے ہوئے کہا کہ پاکستان افغانستان میں قیام امن کے لیے مذاکرات کا حامی ہے۔
انھوں نے آسیان ممالک سے کہا کہ وہ افغانستان میں امن کے لیے مذاکرات کی بھرپور حمایت کریں۔
مشیر قومی سلامتی و خارجہ امور نے مشرق وسطیٰ میں امن و استحکام کو لاحق خطرات پر تشویش کا اظہار کیا۔
،تصویر کا ذریعہAFP
انھوں نے کہا کہ پاکستان بھارت کے ساتھ تمام حل طلب مسائل مذاکرات کے ذریعے حل کرنا چاہتا ہے۔
اس سے قبل سرتاج عزیز نے کہا تھا کہ بھات کی جانب سے مشیروں کی ملاقات کی تجویز پر پاکستان غور کر رہا ہے۔
روس کے شہر اوفا میں وزیراعظم نواز شریف نے بھارتی وزیراعظم نریندر مودی سے ملاقات میں قومی سلامتی کے مشیروں کی ملاقات پر اتفاق کیا تھا۔ مشیر برائے امور خارجہ و قومی سلامتی سرتاج عزیر نے گذشتہ ہفتے کو قومی اسمبلی کے اجلاس میں کہا تھا کہ پاکستان میں بھارت کی خفیہ ایجنسی ’را‘ کی بڑھتی ہوئی سرگرمیوں کا معاملہ دونوں ممالک کے درمیان قومی سلامتی کے مشیروں کے آئندہ اجلاس میں اٹھایا جائے گا۔
قومی اسمبلی میں ہی دئیے گئے تحریری جواب میں سرتاج عزیز نے کہا تھا کہ وزیراعظم اقوام متحدہ کی جنرل اسمبلی کے اجلاس میں ’را‘ کی پاکستان میں مداخلت کا معاملہ اُٹھائیں گے۔
