مصر: فٹبال میچ ہنگامے میں ملوث 11 افراد کی سزا برقرار
،تصویر کا ذریعہBBC World Service
مصر کی ایک عدالت نے سنہ 2012 میں پورٹ سعید میں فٹبال کے ایک میچ کے بعد ہونے والے ہنگامے میں ملوث 11 افراد کی سزائے موت کو برقرار رکھا ہے۔
خیال رہے کہ فروری سنہ 2012 میں مصر کے شہر پورٹ سعید میں فٹبال کلب الاہلی اور المصری کلب کے درمیان ایک میچ کے بعد ہونے والے ہنگامے میں فٹبال کے 74 شائقین ہلاک ہوگئے تھے۔
مصر میں فٹبال میچ کے بعد ہونے والے ان ہنگاموں کو ملک کی تاریخ کے بدترین ہنگاموں میں شمار کیا جاتا ہے۔
مصری عدالت کا یہ فیصلہ اس مقدمے کے 73 مدعا علیہان کی ازسر نو سماعت کے موقعے پر سامنے آیا جس میں 40 دیگر افراد کو 15 برس کی قید کی سزا سنائی گئی۔
عدالت نے اس مقدمے کے دیگر مدعا علیہان کو رہا کر دیا تاہم عدالت کے اس فیصلے کے خلاف اپیل کی جا سکتی ہے۔
اس مقدمے میں متعدد پولیس افسران کے علاوہ فٹبال کلب الاہلی اور المصری کلب کے شائقین پر بھی مقدمہ چلایا گیا۔
مصر کی پولیس پر الزام عائد کیا جاتا ہے کہ وہ پورٹ سعید میں ہونے والے ہنگاموں کے دوران المصری کلب کے حامیوں کے الاہلی کلب کے حامیوں پر حملے کے وقت خاموش تماشائی بنی رہی۔
اس ہنگامے کے دوران متعدد افراد اس وقت پیروں کے نیچے آ کر کچلے گئے جب المصری کلب کے مداحوں نے میچ کے بعد میدان پر پر ہلہ بول دیا۔
End of سب سے زیادہ پڑھی جانے والی
اس واقعےکے بعد مصر کے دارالحکومت قاہرہ میں بھی پرتشدد ہنگاموں کے دوران 16 دیگر افراد ہلاک ہو گئے تھے۔
