کائے سونگ خصوصی اقتصادی زون کھول دیا گیا
شمالی اور جنوبی کوریا کے درمیان کائے سونگ اقتصادی زون کو جو اپریل میں بند کیا گیا تھا کھول دیا گیا ہے۔
دونوں ممالک نے گزشتہ ہفتے ایک سمجھوتے پر دستخط کیے تھے جس میں اس مشترکہ زون کو دوبارہ کھولنے کا فیصلہ کیا گیا تھا۔
اس خصوصی اقتصادی زون میں سو کے قریب جنوبی کوریائی فیکٹریاں ہیں جن میں پچاس ہزار کے قریب شمالی کوریائی باشندے ملازمت کرتے ہیں۔
یہ دونوں ممالک کے مابین آخری فعال مشترکہ پروجیکٹ ہے اور پیونگ یانگ کے لیے آمدنی کا اہم ذریعہ ہے۔
<link type="page"><caption> کائے سونگ اقتصادی زون کھولنے پر اتفاق</caption><url href="http://www.bbc.co.uk/urdu/world/2013/08/130814_koreas_reach_deal_mb.shtml" platform="highweb"/></link>
یاد رہے کہ اپریل کے مہینے میں شمالی کوریا نے بڑھتے ہوئے سیاسی تنازعات کے باعث اپنے ملازمین کو واپس بلا لیا تھا جس کی وجہ سے اس وقت سے وہاں کام بند ہے۔
جنوبی کوریا کی یونیفیکیشن وزارت نے گذشتہ مہینے کہا تھا کہ دونوں فریقین کے درمیان کائے سونگ اقتصادی زون کو دوبارہ کھولنے کے بارے میں ایک پانچ نکاتی معاہدے پر اتفاق ہوا تھا تاہم اب اس اقدام کے لیے تاریخ کا تعین کر دیا گیا ہے۔
خبررساں ادارے اے ایف پی کے مطابق اس معاہدے میں کہا گیا تھا کہ ’جنوبی اور شمالی کوریا ملازمین کی واپسی کے نتیجے میں کائے سونگ اقتصادی کمپلکس کے بند ہو جانے جیسے واقعات کو پھر سے نہیں ہونے دیں گے۔‘
End of سب سے زیادہ پڑھی جانے والی
پیونگ یانگ نے اس زون سے اپریل کے مہینے میں اپنے 53 ہزار مزدوروں کو بظاہر اقوام متحدہ کے ذریعے لگائی گئي پابندی پر غصے کا اظہار کرتے ہوئے ہٹا لیا تھا۔
اس سال 12 فروری کو جب شمالی کوریا نے ایٹمی تجربہ کیا تو اس کے جنوبی کوریا کے ساتھ تعلقات کشیدہ ہو گئے تھے اور اقوام متحدہ نے اس پر بعض پابندیاں عائد کی تھیں۔
