سنٹا لارگا کے ہیروں کا عذاب

برازیل کا روزوولٹ علاقہ قدیم باشندوں کی محفوظ بناہ گاہ ہے۔ اس پناہ گاہ میں سنٹا لارگا واقع ہے جو رونڈونیا اور ماٹو گراسو کی ریاستوں کے درمیان واقع ہے۔

سنٹا لارگو علاقے میں ممکنہ طور پر دنیا کے سب سے زیادہ ہیرے موجود ہیں اور یہی وجہ ہے کہ یہاں کے قدیم باشندوں کا روائتی رہن سہن کو خطرہ لاحق ہے۔

برازیل کے قانون کے تحت اس علاقے میں کسی قسم کی کان کنی ممنوع ہے لیکن اس کے باوجود 1999 سے اس علاقے سے ہیرے نکالے جا رہے ہیں۔

سنٹا لارگا 10 کلومیٹر طویل ہے اور اس کے ساتھ ہی واقع گروٹو دو سوسیگو کان کنی کے باعث جنگل سے محروم ہو گیا ہے۔

قدیم باشنوں کے حق میں آواز اٹھانے والے کارکنان نے متنبہ کیا ہے کہ سنٹا لارگو میں جنگلات کی کٹائی گروٹو دو سوسیگو سے کہیں زیادہ ہو گی۔

ایک اندازے کے مطابق سالانہ تین کروڑ 14 لاکھ ڈالر مالیت کے ہیرے نکالے جاتے ہیں اور یہ سب غیر قانونی طور پر کیا جا رہا ہے۔

برازیل کے ماہر ارضیات کا کہنا ہے کہ برازیل کے جیولوجیکل سروے کے مطابق اس علاقے سے سالانہ 10 لاکھ کیرٹ کے ہیرے نکالے جا سکتے ہیں جن کی مالیت 20 کروڑ ڈالر سے زیادہ ہے۔

ہیروں کا ایک ذخیرہ سنٹا لارگا کے لائس نامی علاقے میں ہے۔ یہاں پر کان کنی کرنے والی کمپنی کی رپورٹ کے مطابق اس علاقے میں لائس جیسے 14 علاقے ہیں جہاں وہ پتھر پایا جاتا ہے جن میں ہیرے ہوتے ہیں۔

اگر یہ تخمینہ درست ہے تو روزوولٹ ریزرو ہیروں کا سب سے بڑا ذخیرہ ہے۔

سنٹا لارگا کا کہنا ہے کہ اگر ان سے پوچھا جائے تو وہ اپنے علاقے میں غیر قانونی کان کنی نہیں ہونے دیں۔ علاقے کے ایک رہنما نے کہا 'لیکن مسئلہ یہ ہے کہ حکومت ہمارا ساتھ نہیں دیتی اور ہماری کئی اشد ضروریات ہیں۔'

'ہمارے پاس ادویات نہیں اور نہ ہی ٹرانسپورٹ ہے اور ہمارے لیے کوئی مواقع بھی نہیں ہیں۔'

غیر قانونی کان کنی کرنے والوں نے علاقے کے قدیم باشنوں کو چند سہولیات دی ہیں تاکہ ان کا اعتماد حاصل کیا جا سکے اور ان کو قائل کیا جا سکے کہ کان کنی کرنے دی جائے۔