امریکہ: بستر میں پوشیدہ دو کروڑ ڈالر برآمد
،تصویر کا ذریعہTwitter
امریکی ریاست میساچوسٹس میں حکام نے ایک برازیلین باشندے کے فلیٹ میں سے دو کروڑ ڈالر برآمد کیے ہیں جو کہ انھوں نے اپنے بستر میں چھپائے ہوئے تھے۔
حکام کے مطابق یہ رقم ایک ارب ڈالر کے فراڈ کی ایک سکیم سے منسلک ہے جس میں ٹیلیکس فری نامی کمپنی ملوث ہے۔ یہ کمپنی انٹرنیٹ سروس فراہم کرنے کا دعویٰ کرتی تھی۔
حکام نے کہا ہے کہ اس کمپنی نے دنیا بھر کے دس لاکھ لوگوں سے ایک ارب ڈالر لوٹے ہیں۔
پولیس کے تفتیش کاروں کو یہ رقم 28 سالہ برازیلین شخص کلیبر رین ریزیرو روکا کے فلیٹ سے ملی جو کہ فراڈ کے الزام میں گرفتار ہے۔
میساچوسٹس کے اٹارنی کے دفتر سے ایک ٹویٹ کی گئی جس میں بستر سے ملنے والی رقم کی تصویر دیکھی جا سکتی ہے۔
عدالت کے مطابق کلیبر رین ریزیرو روکا پر شک تھا کہ وہ فرار ہو سکتے ہیں اس لیے انھیں حراست میں لیا گیا ہے۔
پولیس کے تفتیشی اہلکاروں کا کہنا ہے کہ کلیبر رین ریزیرو روکا لاکھوں ڈالر منی لانڈرنگ کے ذریعے ہانگ کانگ منتقل کر رہے تھے۔
سرکاری وکلا کے مطابق ٹیلیکس فری کمپنی وائس اوور انٹرنیٹ پروٹوکول کی سروس فراہم کرنے کے نام پر لوگوں کو جھانسے دے کر پیسے کماتی تھی ۔
End of سب سے زیادہ پڑھی جانے والی
