قتل کے مجرم سعودی شہزادے کو سزائے موت دے دی گئی
،تصویر کا ذریعہGetty Images
سعودی عرب کے دارالحکومت ریاض میں وزارتِ داخلہ کا کہنا ہے کہ ایک شہزادے کو قتل کے جرم میں سزائے موت دے دی گئی ہے۔
شہزادے ترکی بن سعود الکبیر کو ریاض میں یہ سزا دی گئی تاہم یہ نہیں بتایا گیا ہے کہ انھیں سزائے موت کس طریقے سے دی گئی ہے۔ تفصیلات کے مطابق مذکورہ واقعہ تین سال قبل پیش آیا تھا۔
سعودی عرب میں سزائے موت کے زیادہ تر مجرموں کا سرقلم کیا جاتا ہے۔
خبر رساں ادارے اے ایف پی کے مطابق اس سال سعودی عرب میں سزائے موت پانے والے یہ 134 ویں شخص تھے۔
تاہم شاہی خاندان کے افراد کو سزا دیا جانا ایک غیر معمولی بات ہے۔
وزارتِ داخلہ کا کہنا ہے کہ شہزادے ترکی بن سعود الکبیر نے ایک شخص کو ہلاک کرنے کے جرم کا اعتراف کیا تھا۔
وزارتِ داخلہ کے بیان میں کہا گیا ہے کہ حکومت میں شامل ہر شخص ملک میں سکیورٹی اور انصاف قائم رکھنا چاہتا ہے۔
مقامی اخبار عربیہ کا کہنا ہے کہ مقتول کے رشتے داروں نے اس واقعے کے بعد دیت کی رقم قبول کرنے سے انکار کر دیا تھا۔
End of سب سے زیادہ پڑھی جانے والی
سعودی تاریخ میں شاہی خاندان کے کسی رکن کو سزائے موت دیے جانے کا سب سے اہم واقعہ شہزادے فیصل بن مسعید کو اپنے تایا شاہ فیصل بن سعود کو 1975 میں قتل کرنے کے بعد سزائے موت کا ہے۔
سعودی عرب میں سزائے موت پانے والے زیادہ تر افراد منشیات کے کاروبار سے منسلک یا پھر قتل کے مجرم ہوتے ہیں۔ تاہم اس سال جنوری میں ایک ہی دن میں دہشتگردی کے الزام میں 50 افراد کو سزائے موت سنائی گئی تھی جن میں معروف شیعہ عالم نمر النمر بھی شامل تھے۔
