عبدالرشید شکور بی بی سی اردو ڈاٹ کام، کراچی

	کپتان یونس خان مثبت سوچ کے حامل ہیں: انتخاب عالم

دوسرے دن کے کھیل کے اختتام پر صحافیوں سے بات کرتے ہوئے انتخاب عالم نے کہا کہ وکٹ کی تیاری کی ذمہ داری کیوریٹر پر عائد ہوتی ہے ۔ ’ہم نے انہیں بتا دیا تھا کہ کس طرح کی وکٹ چاہیئے۔ ہم نے اس طرح کی وکٹ بنانے کے لئے قطعاً نہیں کہا تھا جو اس وقت ہے۔‘

انتخاب عالم نے کہا کہ وکٹ ایسی ہونی چاہیئے تھی جس پر باؤنس اورگھاس ہوتی کیونکہ وہ اس ٹیسٹ میں اپنے تیز بولرز پر بھروسہ کر رہے تھے۔

واضح رہے کہ سری لنکا نے پہلی اننگز میں سات وکٹوں پر چھ سو چوالیس رنز کا بھاری اسکور بنا ڈالا ہے۔

انتخاب عالم نے کہا کہ وہ اس وکٹ سے خوش نہیں ہیں، یہ ان کی توقعات کے بالکل برعکس وکٹ ہے۔

پاکستانی کوچ نے کہا کہ دنیا بھر میں گراؤنڈ کے وسط میں واقع وکٹ ٹیسٹ میچ کے لئے محفوظ رکھی جاتی ہے اور اس پر ڈومیسٹک کرکٹ کے میچز نہیں ہوتے لیکن پاکستان میں ایسا نہیں ہوتا اور اسپانسرز کے اصرار پر مرکزی وکٹ پر میچز رکھے جاتے ہیں۔

انتخاب عالم نے اعتراف کیا کہ پہلے دن ان کے بولرز خصوصاً دانش کنیریا نے اچھی بولنگ نہیں کی۔ ان کا کہنا تھا کہ ممکن ہے اس کی وجہ یہ ہو کہ وہ چودہ ماہ بعد انٹرنیشنل کرکٹ کھیل رہے ہیں۔

انہوں نے یونس خان کی جارحانہ فیلڈ پلیسنگ کا دفاع کرتے ہوئے کہا کہ وہ مثبت سوچ کے حامل کپتان ہیں۔ پاکستانی کوچ نے امید ظاہر کی کہ ان کے بیٹسمین اس مشکل صورتحال میں ذمہ داری کا مظاہرہ کرینگے۔