عبدالرشید شکور بی بی سی اردو ڈاٹ کام کراچی

	توقع ہے کہ دو اضافی ون ڈے ملتان اور فیصل آباد میں کھیلے جائیں گے

پاکستان کرکٹ بورڈ کے چیف آپریٹنگ آفیسر سلیم الطاف نے بی بی سی کو بتایا کہ سری لنکن کرکٹ بورڈ نے پیر کو بذریعہ ای میل ایک ٹوئنٹی ٹوئنٹی میچ کی جگہ مزید دو ون ڈے انٹرنیشنل میچز کھیلنے کی درخواست کی تھی جس سے پی سی بی نے اصولی طور پر اتفاق کیا ہے۔

انہوں نے کہا کہ نئے پروگرام کے مطابق اب تین ٹیسٹ اور پانچ ون ڈے انٹرنیشنل میچز کھیلے جائیں گے۔

پاکستان کرکٹ بورڈ نے سری لنکن بورڈ کو جو پروگرام بھیجا تھا اس کے مطابق ٹیسٹ میچز لاہور ملتان اور کراچی میں کھیلے جانے تھے جبکہ دو ون ڈے لاہور اور ایک کراچی میں اور کراچی میں ہی ایک ٹوئنٹی ٹوئنٹی میچ بھی ہونا تھا۔

توقع ہے کہ دو اضافی ون ڈے ملتان اور فیصل آباد میں کھیلے جائیں گے۔سری لنکا کی ٹیم انیس جنوری کو پاکستان پہنچے گی۔

سری لنکا کا یہ دورہ بھارت کی جانب سے پاکستان کا دورہ منسوخ کیے جانے کے بعد ترتیب دیا گیا ہے۔