جو دورہ ختم کیا گیا تو دو ایک روزہ میچ کھیلے جانے باقی تھے۔

انگلینڈ اینڈ ویلز کرکٹ بورڈ نے کہا ہے کہ کسی بھی کھلاڑی کو انڈیا کا دورہ کرنے پر مجبور نہیں کیا جائے گا۔

انگلینڈ کی ٹیم انڈیا کا دورہ کر رہی تھی لیکن ممبئی میں حملوں کی وجہ سے وطن لوٹ گئی تھی۔ اس وقت دو ایک روزہ میچ اور دو ٹیسٹ کھیلے جانے باقی تھے۔

ایک روزہ میچ تو اب نہیں کھیلے جائیں گے لیکن ٹیسٹ سیریز بچانے کی کوششیں جاری ہیں۔

انڈین بورڈ کے مطابق ای سی بی اس بات پر رضامند ہے کہ احمد آباد اور ممبئی کے ٹیسٹ چنئی اور موہالی منتقل کر دیے جائیں اور پہلا میچ گیارہ دسمبر سے کھیلا جائے گا۔

لیکن تین روز کا ایک وارم اپ میچ، جو پہلے پروگرام میں شامل تھا، اب منسوخ کر دیا گیا ہے۔

انڈیا میں سکیورٹی کی صورتحال کا جائزہ لینے کے لیے ایک ماہر کو چنئی بھیجا جارہا ہے۔ پروفیشنل کرکٹ ایسوسی ایشن کے چیف ایگزیکٹو شون مارس نے کہا کہ ماہر کی رپورٹ آنے کے بعد ہم کھلاڑیوں سے بات کریں گے اور انڈیا جانے یا نہ جانے کے بارے میں فیصلہ کرنے میں ان کی مدد کریں گے۔

’ہم ایک گروپ کے طور پر فیصلہ کریں گے لیکن انفرادی فیصلوں کی بھی گنجائش ہوگی۔‘

اسی دوران بی سی سی آئی کے نائب صدر للت مودی نے کہا ہےکہ انہیں امید ہے کہ اگر انگلینڈ کی ٹیم سکیورٹی کے تعلق سے مطمئن ہوجاتی ہے تو وہ ٹییسٹ سیریز کھلنے آجائے گی۔

’ہمارے لیے کھلاڑیوں اور شائقین کی حفاظت سب سے اہم ہے۔ لیکن ساتھ ہی ہمیں اس بات کا بھی خیال رکھنا چاہیے کہ دہشت گرد اپنے مقاصد میں کامیاب نہ ہوجائیں۔‘