عبدالرشید شکور بی بی سی اردو ڈاٹ کام، ابوظہبی

	’ٹیم کو جیت کے سنہری مواقع میسر آئے لیکن ان سے فائدہ نہیں اٹھایا جاسکا‘

جان ڈائی سن نے بی بی سی سے بات کرتے ہوئے کہا کہ ان کی ٹیم کو جیت کے سنہری مواقع میسر آئے لیکن ان سے فائدہ نہیں اٹھایا جا سکا۔

جان ڈائی سن، جو آسٹریلیا کی طرف سے ٹیسٹ اور ون ڈے کھیلنے کے بعد سری لنکا کے کوچ بھی رہ چکے ہیں کہتے ہیں کہ ’متعدد مواقعوں پر ان کی بولنگ اور فیلڈنگ اچھی رہی جبکہ تجربہ کار بیٹسمینوں نے عمدہ بیٹنگ کی لیکن بحیثیت ٹیم ہر شعبے میں بہتری کی ضرورت ہے‘۔

ڈائی سن کا کہنا ہے کہ آسٹریلیا میں فرسٹ کلاس کرکٹ کا مضبوط ڈھانچہ موجود ہے اور اسی وجہ سے جب آسٹریلوی ٹیم میں کوئی کرکٹر آتا ہے تو وہ منجھا ہوا ہوتا ہے جبکہ اس کے برعکس ویسٹ انڈین فرسٹ کلاس کرکٹ میں بہتری لانی ہوگی کیونکہ جب کوئی کرکٹر ویسٹ انڈین ٹیم میں آتا ہے تو اس میں بنیادی خامیاں موجود ہوتی ہیں۔

ویسٹ انڈین کوچ نے کہا کہ تیسرے میچ میں بھی ان کی ٹیم جیت سکتی تھی لیکن چندر پال کے جلد آؤٹ ہوجانے سے میچ پر ان کی گرفت کمزور پڑگئی جبکہ پاکستانی ٹیم نے ملنے والے مواقعوں سے فائدہ اٹھایا۔

واضح رہے کہ ویسٹ انڈیز کی ٹیم اس سال جنوبی افریقہ سے پانچ صفر اور آسٹریلیا سے بھی پانچ صفر سے سیریز ہار چکی ہے اور اس نے صرف سری لنکا کینیڈا اور برمودا کے خلاف کامیابی حاصل کی ہیں۔