مناء رانا بی بی سی اردو ڈاٹ کام، لاہور

	پاکستان ہاکی پر تحقیق و ترقی میں ڈچ ماہر مدد کریں گے

پاکستان ہاکی فیڈریشن کے نئے صدر قاسم ضیاء نے چند روز قبل کہا تھا کہ ملک میں ہاکی کی ترقی اور گراس روٹ کی سطح پر ہاکی کا ڈھانچہ درست کرنے کے لیے ریسرچ اور ڈیویلپمنٹ کا ایک منصوبہ بنایا گیا ہے اور اس کے لیے غیرملکی ماہر کی خدمات حاصل کی جائیں گی۔

ان کا یہ بھی کہنا تھا کہ سینیئر ٹیم کے لیے غیرملکی کوچ کی خدمات کی بجائے ہمیں اس میدان میں غیر ملکی ماہر کی خدمات حاصل کرنی چاہیئے۔

پاکستان ہاکی فیڈریشن کے سیکریٹری آصف باجوہ نے بی بی سی سے بات کرتے ہوئے بتایا کہ ہاکی کے ڈچ ماہر ووٹر ٹیزلر کی آمد اسی سلسلے میں ہے۔ انہوں نے کہا کہ یہ ماہر دس روز کے لیے پاکستان آ رہے ہیں۔

وہ ہاکی فیڈریشن کے سامنے پریزینٹیشن دیں گے اوراس دوران ہاکی فیڈریشن اور ان کے درمیان طویل مدت کے لیے معاہدہ کرنے کے لیے شرائط طے کی جائیں گی۔

آصف باجوہ کے بقول ووٹر ٹیزلر ہاکی کے کوچ ہونے کے علاوہ ہاکی کی ڈیویلیپمنٹ کا وسیع تجربہ رکھتے ہیں اور ان کی خاص بات یہ ہے کہ ہالینڈ میں ان کا بنایا ہوا اکیڈمی پروگرام یورپ میں بہت مقبول ہوا تھا۔

آصف باجوہ کا کہنا تھا کہ پاکستان میں گیارہ ہاکی اکیڈمیز بنانے کا جو ہاکی فیڈریشن کا منصوبہ ہے اس میں ووٹر ٹیزلر کی خدمات سے بہت فائدہ ہوگا۔ہاکی فیڈریشن پاکستان میں ہاکی کا نیا سلیبس بھی متعارف کروانا چاہتی ہے تاکہ پورے ملک میں ایک ہی طریقہ سے ہاکی کھیلی جائے۔ اس ضمن میں بھی اس غیرملکی ماہر سے استفادہ کیا جائے گا۔