عبدالرشید شکور بی بی سی اردو ڈاٹ کام، کراچی

	اسلام آباد نے ٹوئنٹی ٹوئنٹی ٹورنامنٹ کے لئے اپنی ٹیم میں شامل کیا ہے

پاکستان کرکٹ بورڈ نے اس درخواست میں استدعا کی ہے کہ لاہور ہائی کورٹ نے شعیب اختر پر اٹھارہ ماہ پابندی کی سزا معطل کردی تھی لیکن ان پر عائد سترلاکھ روپے جرمانے کی سزا معطل نہیں کی تھی لہذا جب تک وہ جرمانہ ادا نہیں کرتے وہ پاکستان میں اور پاکستان کی طرف سے کھیلنے کے اہل نہیں ہیں۔

شعیب اختر کو اسلام آباد نے چار اکتوبر سے شروع ہونے والے قومی ٹوئنٹی ٹوئنٹی ٹورنامنٹ کے لئے اپنی ٹیم میں شامل کیا ہے۔ اس صورتحال میں پاکستان کرکٹ بورڈ نے اس درخواست کے ذریعے عدالت سے وضاحت مانگی ہے کہ کیا شعیب اختر جرمانہ ادا کئے بغیر کھیل سکتے ہیں یا نہیں۔

دلچسپ بات یہ ہے کہ ایک جانب تو پاکستان کرکٹ بورڈ شعیب اختر کے کھیلنے کی اہلیت کے بارے میں عدالت سے رجوع کر رہا ہے اور دوسری جانب اس نے انہیں نہ صرف آئی پی ایل اور کاؤنٹی کرکٹ کھیلنے کی خصوصی اجازت دی بلکہ چیمپئنز ٹرافی کے لئے پاکستانی ٹیم میں بھی شامل کرلیا۔

اس بارے میں پاکستان کرکٹ بورڈ کے چیف آپریٹنگ آفیسر شفقت نغمی یہ موقف اختیار کرچکے ہیں کہ ان سے جرمانہ کسی بھی وقت وصول کیا جاسکتا ہے۔

دریں اثنا لاہور کی سول عدالت ہفتے کو سابق کپتان سلیم ملک پر عائد تاحیات پابندی کے مقدمے کی سماعت کرے گی۔

سلیم ملک نے میچ فکسنگ میں مبینہ طور پر ملوث ہونے کی پاداش میں تاحیات پابندی کے فیصلے کو سپریم کورٹ میں چیلنج کیا تھا جس نے یہ کیس سول کورٹ کی طرف واپس کرتے ہوئے اسے دوبارہ اس کی سماعت کے لئے کہا تھا۔