مناء رانا بی بی سی اردو ڈاٹ کام، لاہور

	جیف لاسن کو کرکٹ مبصرین کی جانب سے ان کی کارکردگی پر تنقید کا سامنا ہے

جیف لاسن کی یکا یک روانگی کو میڈیا میں ان کی مستقل روانگی سے تعبیر کیا گیا کیونکہ پاکستان کرکٹ بورڈ کے سابق چئرمین ڈاکٹر نسیم اشرف کے استعفے کے بعد پاکستانی کوچ کے مستقبل پر بھی سوال اٹھائے جانے لگے۔

جیف لاسن نے دو دن پہلےخود یہ کہا کہ اگر پی سی بی کی نئی انتظامیہ بطور کوچ ان کی خدمات نہیں چاہے گی تو وہ ہنسی خوشی اپنے ملک واپس چلے جائیں گے کیونکہ انہیں آسٹریلیا سے بھاری معاوضے کی دیگر پیشکش ہوئی ہے۔

جیف لاسن کو کرکٹ مبصرین کی جانب سے ان کی کارکردگی پر تنقید کا بھی سامنا ہے۔ ان حالات کے تناظر میں جیف لاسن کی فوری روانگی کو مختلف زاویوں سے دیکھا گیا۔

تاہم پاکستان کرکٹ بورڈ کے میڈیا ڈائریکٹر منصور سہیل نے اس کی وضاحت کرتے ہوئے کہا کہ جیف لاسن دس دن کی چھٹیاں گزارنے کے لیے آسٹریلیا گئے ہیں اور وہ سترہ ستمبر کو واپس آ جائیں گے۔انہوں نے کہا کہ اگر اس دوران سری لنکا کے ساتھ مجوزہ سیریز طے پا گئی تو جیف لاسن فورا واپس آ جائیں گے۔

بعض مبصرین کے مطابق جیف لاسن کے اس موقع پر چھٹی پر چلے جانے سے یہ اشارہ ملتا ہے کہ پاکستان کی ٹیم کا سری لنکا کا دورہ طے نہیں پا سکا۔ پی سی بی کے چیف آپریٹنگ آفیسر شفقت نغمی نے پہلے ہی کہا تھا کہ اگر یہ دورہ ہونا ہوا تو پیر تک طے ہو جائے گا لیکن پیر کے روز سری لنکا کے دورے کی کوئی اطلاع نہیں آئی۔