عبدالرشید شکور بی بی سی اردو ڈاٹ کام، کراچی

	عقیم عباس کو پاکستانی کلب کی طرف سے گیارہ میچ کھیلنے کا معاوضہ صرف ستائیس سو پاکستانی روپے ملا

عقیم عباس روشن مستقبل کی خواہش کے ساتھ پاکستان کے ایک فٹبال کلب کی نمائندگی کرنے گزشتہ سال نومبر میں پاکستان آئے تھے لیکن یہاں حالات ان کے لیے بہت مشکل رہے اور وہ چند افراد کی کوشش کے نتیجے میں وطن واپس جانے میں کامیاب ہوسکے۔

عقیم عباس نے وطن واپسی سے قبل بی بی سی سے بات کرتے ہوئے کہا کہ انہوں نے اپنے ایک دوست کے توسط سے جرمنی میں مقیم فٹبال کے ایک پاکستانی ایجنٹ کے ذریعے پاکستان کے وہیب کلب سے کھیلنے پر رضامندی ظاہر کی تھی جس پر انہیں ائر ٹکٹ اور تین ہزار ڈالرز دینے کا وعدہ کیا گیا تھا۔ وہ اپنے خرچ پر پاکستان آئے لیکن ان سے جو بھی وعدے کئے گئے تھے وہ پورے نہیں ہوئے۔وہ وہیب کلب کی طرف سے پاکستان کی پریمیئر لیگ میں گیارہ میچز کھیلے اور جب باقاعدہ کنٹریکٹ دینے کے ان کے مطالبے میں شدت آئی تو کلب نے انہیں صرف ستائیس سو پاکستانی روپے دے کر فارغ کر دیا۔

عقیم عباس کا کہنا ہے کہ انہوں نے کلب کے صدر حافظ سلمان بٹ سے بھی ملنے کی بہت کوشش کی لیکن انہیں ملنے نہیں دیا گیا اور یہی کہا جاتا تھا کہ وہ بہت مصروف ہیں۔ انہوں نے پاکستان فٹبال فیڈریشن کے حکام سے بھی رابطہ کیا لیکن ان کی کوئی سنوائی نہیں ہوئی۔

عقیم عباس مڈ فیلڈر ہیں اور نائجیریا کی بی لیگ میں کھیلتے ہیں۔ وہ گھانا اور آئیوری کوسٹ میں بھی نمائشی میچز کھیل چکے ہیں لیکن ملک سے باہر اپنی مہارت بھرپور انداز میں دکھانے کے لیے انہوں پاکستان کا انتخاب کیا ۔ان کا کہنا ہے کہ انہوں نے جو بھی خواب دیکھ رکھے تھے وہ بکھر کر رہ گئے۔

	پاکستان میں دوبارہ فٹبال کھیلنے کا سوال ہی پیدا نہیں ہوتا: عقیم عباس

عقیم عباس سابق انٹرنیشنل ریفری احمد جان اور مقامی کونسلر عبدالاحد کے بھی شکر گزار ہیں جنہوں نے کراچی میں قیام کے دوران ان کا بہت خیال رکھا۔

کراچی میں قیام کے دوران عقیم عباس نے کافی دوست بنا لیے اور اب تو وہ اردو کے چند لفظ بھی سیکھ گئے تھے اور بھارتی گانا ’موجاں ہی موجاں‘ بھی گنگنانے لگے تھے۔

عقیم عباس نے کہا کہ پاکستان میں ان کے ساتھ ہونے والے سلوک اور ان کی حالت پر جب رپورٹیں میڈیا میں آئیں تو ان کی والدہ، بہنیں اور بھائی پریشان ہوگئے لیکن انہوں نے انہیں فون کرکے بتایا کہ پریشان ہونے کی ضرورت نہیں کیونکہ وہ بہت جلد ان کے درمیان ہونگے۔

نوجوان عقیم عباس کو وطن واپس جانے کی بہت خوشی تھی لیکن اس بات کا افسوس بھی تھا کہ کراچی میں ان سے محبت کرنے والے ساتھیوں کا ساتھ چھوٹ جائے گا تاہم وہ یہ کہہ کر وطن واپس گئے ہیں کہ پاکستان میں دوبارہ فٹبال کھیلنے کا سوال ہی پیدا نہیں ہوتا لیکن موقع ملا تو وہ ان لوگوں سے ملنے کراچی ضرور آئیں گے کیونکہ یہاں ’موجاں ہی موجاں‘ ہے۔

انٹرنیشنل ریفری احمد جان عقیم عباس کے ساتھ ہونے والے سلوک کا ذمہ دار پاکستان فٹبال فیڈریشن کو ٹھہراتے ہیں ان کا کہنا ہے کہ اس سے ملک کی بدنامی ہوئی ہے۔ پاکستان فٹبال فیڈریشن فیفا سے ملنے والے کروڑوں روپے خوب خرچ کر رہی ہے کیا چند ہزار کا ٹکٹ بنواکر عقیم عباس کی وطن واپسی کو ممکن نہیں بنایا جا سکتا تھا۔

انہوں نے کہا کہ پاکستان فٹبال فیڈریشن کے صدر فیصل صالح حیات کو پہلے تو اس معاملے کا پتہ ہی نہیں تھا جب انہیں پتہ چلا تو انہوں نے بھی یہ کہہ کر دامن بچالیا کہ عقیم ایک ’امیچر‘ کھلاڑی تھا۔

پاکستان فٹبال فیڈریشن کے سیکریٹری احمد یار لودھی نے اس صورتحال پر بی بی سی سے بات کرتے ہوئے یہ تسلیم کیا کہ وہیب کلب نے عقیم عباس کو پاکستانی کھلاڑی ظاہر کرکے کھلا دیا لیکن چونکہ عقیم کے پاس کوئی تحریری معاہدہ نہیں تھا لہذا وہیب کلب کے خلاف سخت کارروائی ممکن نہ تھی اس کے باوجود وہیب کلب کے ان میچوں کے پوائنٹس منہا کردیئے گئے جن میں عقیم کھیلا تھا۔ ’اگر اس کے پاس باقاعدہ کنٹریکٹ ہوتا تو وہیب کلب سے اس کے تمام مالی نقصان کی تلافی کرانے کی کوشش کی جاتی۔‘