عبدالرشید شکور بی بی سی اردو ڈاٹ کام، کراچی

	طلعت علی پی سی بی کے ساتھ دو سالہ معاہدے پر پاکستانی ٹیم کے منیجر کا عہدہ سنبھالے ہوئے ہیں

طلعت علی کی میچ ریفری کی حیثیت سے آئی پی ایل میں تقرری اس لحاظ سے حیران کن ہے کہ وہ دو ہزار ایک کے بعد سے میچ ریفری کے طور پر کہیں بھی دکھائی نہیں دیئے۔ اس وقت وہ پاکستان کرکٹ بورڈ کے ساتھ دو سالہ معاہدے پر پاکستانی کرکٹ ٹیم کے منیجر کا عہدہ سنبھالے ہوئے ہیں۔

پاکستان کرکٹ بورڈ کے چیف آپریٹنگ آفیسر شفقت نغمی نے بی بی سی سے بات کرتے ہوئے طلعت علی کی میچ ریفری کی حیثیت سے آئی پی ایل میں تقرری کا دفاع کیا۔

انہوں نے کہا کہ اسوقت پاکستانی کرکٹ ٹیم کی کوئی بین الاقوامی مصروفیت نہیں ہے اور طلعت علی نے پاکستان کرکٹ بورڈ سے درخواست کی تھی کہ وہ چھٹی لے کر آئی پی ایل میں جانا چاہتے ہیں جس پر انہیں اجازت دے دی گئی ہے۔ تاہم وہ اس عرصے کے دوران منیجر کی تنخواہ نہیں لے سکیں گے۔

شفقت نغمی نے یہ بھی کہا کہ طلعت علی مینیجر تو اس وقت بنیں گے جب کوئی دورہ ہوگا۔ فل ٹائم تو ٹیم بھی نہیں ہوتی ہے اور ٹیم بھی اسی وقت بنتی ہے جب کوئی سیریز ہوتی ہے۔

جب انہیں یاد دلایا گیا کہ پاکستان کرکٹ بورڈ نے طلعت علی کو دو سال کے لیے ٹیم منیجر مقرر کر رکھا ہے تو اس پر شفقت نغمی نے کہا کہ سرکاری ملازمتوں میں بھی ایسا ہوتا ہے کہ ایک شخص چھٹی کی درخواست دیتا ہے کہ وہ اس عرصے کوئی اور کام کرنا چاہتا ہے لیکن وہ حکومت سے تنخواہ نہیں لے گا جس کی اسے اجازت دے دی جاتی ہے۔

دلچسپ بات یہ ہے کہ پاکستان کرکٹ بورڈ نے سابق ٹیسٹ کرکٹر محسن خان کو بھی ایک ٹی وی چینل پر پروگرام کرنے کی اجازت دے رکھی ہے۔ وہ اسوقت نیشنل اسٹیڈیم میں ریجنل جنرل منیجر کے فرائض انجام دے رہے ہیں۔