ریحانہ بستی والا بی بی سی اردو ڈاٹ کام، ممبئی

	پریتی زنٹا اور نیس واڈیا نے چندی گڑھ،موہالی ٹیم کی کامیاب بولی دی

انڈین پریمیئر لیگ کی ٹیموں کی نیلامی ممبئی میں ہوئی جس میں گیارہ بڑی ملکی اور غیر ملکی کمپنیوں نے بولی لگائی۔

یہ بولی ملک کے آٹھ شہروں کی ٹیموں کے لیے لگائی گئی جس میں سب سے زیادہ بولی ممبئی اور دہلی کے لیےلگی۔

صنعتکار مکیش امبانی نے ممبئی کی ٹیم کے لیے 111.90 ملین امریکی ڈالر، شاہ رخ، جوہی چاؤلہ، اور جے مہتہ کے گروپ نے کولکتہ ٹیم کے لیے 75.09 ملین ڈالر، پریتی زنٹا اور نیس واڈیا کے کنشورشیم نے چندی گڑھ اور موہالی ٹیم کے لیے 76 ملین ڈالر، وجے مالیا نے بنگلور کے لیے 111.60 ملین ڈالر کی بولی دی۔

بولی لگانے والی ان کمپنیوں کو اپنی ٹیم بنانے کے اختیارات دیے جائیں گے۔ ہر ٹیم میں غیر ملکی کھلاڑی لیے جائیں گے لیکن ایک ٹیم میں آٹھ سے زیادہ غیر ملکی کھلاڑیوں کو نہیں کھلایا جا سکتا۔ اس کے علاوہ ٹکٹ کی فروخت اور اشتہارات سے ہونے والی آمدنی پر ان کمپنیوں کے اختیارات ہوں گے۔

اس کے علاوہ چینئی کے لیے انڈیا سمینٹ نے اکانوے ملین ڈالر، دہلی کے لیے جی ایم آر ہولڈنگ نے چوراسی ملین ڈالر، حیدرآباد کے لیے دکن کرونیکل نے 107.01 ملین ڈالر جبکہ انویسٹرز ان کرکٹ گروپ نے جے پور ٹیم کے لیے 67 ملین ڈالر کا کامیاب بولی دی۔

بولی لگانے والی ان کمپنیوں کو اپنی ٹیم بنانے کے اختیارات دیے جائیں گے۔ ہر ٹیم میں غیر ملکی کھلاڑی لیے جائیں گے لیکن ایک ٹیم میں آٹھ سے زیادہ غیر ملکی کھلاڑیوں کو نہیں کھلایا جا سکتا۔ اس کے علاوہ ٹکٹ کی فروخت اور اشتہارات سے ہونے والی آمدنی پر ان کمپنیوں کے اختیارات ہوں گے۔

ادھر شاہ رخ خان نے ایک بیان میں کہا ہے کہ کرکٹ کے فروغ کے لیے انہوں نے اپنے دوستوں کے ساتھ مل کر ٹیم خریدنے کا منصوبہ بنایا تھا وہیں پریٹی زنٹا کا کہنا ہے کہ انہیں یوراج سنگھ بہت پسند ہیں اور انہیں خوشی ہے کہ انہیں چندی گڑھ کی ٹیم ملی ہے۔

بی سی سی آئی کے نائب صدر للت مودی نے پریس کانفرنس میں اس نیلامی کی تفصیلات دیتے ہوئے بتایا کہ ٹیموں کے بعد اب سات فروری کو کھلاڑیوں کے لیے بولی لگائی جائے گی۔ مودی کے مطابق آئی پی ایل کی ٹورنامنٹ اٹھارہ اپریل سے شروع ہوں گے۔ ليگ کے 59 میچ ہوں گے اور یہ انٹرنیشنل کرکٹ کونسل کے ضابطوں کے مطابق کھیلا جائے گا۔

مودی نے بتایا کہ بی سی سی آئی نے میڈیا کے حقوق پہلے ہی سونی ڈبلیو ایس جی کو فروخت کر دیے تھے ۔ایک سوال کے جواب میں مودی نے کہا کہ شاہ رخ کو کبھی بھی بی سی سی آئی نے کرکٹ گراؤنڈ پر کھیل دیکھنے سے منع نہیں کیا ہے۔ انہوں نے کہا کہ شاید شاہ رخ کو کرکٹ سے لگاؤ تھا اس لیے انہوں نے بولی لگائی ہے۔