بکنر ٹیسٹ کرکٹ میں سب سے زیادہ تجربہ کار امپائر ہیں

آئی سی سی کا یہ فیصلہ سڈنی ٹیسٹ میں سٹیو بکنر کی خراب امپائرنگ اور ہربھجن سنگھ کے خلاف تین ٹیسٹ میچوں پر پابندی کے متعلق ہندوستان کے سخت احتجاج کے بعد آیا ہے۔ ہندوستان نے ٹیسٹ میچ نہ کھیلنے کی دھمکی دے رکھی تھی۔

ملبورن میں ایک پریس کانفرنس میں آئی سی سی کے صدر میلکم سپیڈ نے بتایا کہ پرتھ میں ہونے والے تیسرے ٹیسٹ میں سٹیو بکنر کی جگہ نیوزی لینڈ کے امپائر بلی بوڈن ائمپائرنگ کریں گے۔

دلچسپ بات یہ ہے کہ پیر کو آئی سی سی نے کہا تھا کہ، تیسرے ٹیسٹ کے لیے بکنر امپائرنگ کریں گے۔

دوسری جانب ہربھجن کی اپیل پر میلکم سپیڈ کا کہنا تھا کہ بدھ تک ان کی اپیل پر سماعت کے لیے ایک کمشنر کی تقرری کی جائے گي۔ تاہم انہوں نے یہ نہيں بتایا کہ سماعت کب سے شروع ہوگي۔ ہربھجن پرمبینہ نسل پرست فقرے بازی کرنے پر تین ٹیسٹ میچوں کی پابندی عائد کی گئی ہے۔

ماہرین کاکہنا ہےکہ اگر ہربھجن کی اپیل کی سماعت سولہ جنوری کو ہونے والے تیسرے ٹسٹ سے قبل نہیں شروع ہوپاتی ہے تو وہ پرتھ ٹسٹ میچ میں حصہ لے سکتے ہيں۔

انڈیا کے کرکٹ بورڈ نے تیسرے ٹیسٹ میچ کے لیے سٹیو بکنر پر ’نا اہلی‘ کا الزام لگاتے ہوئے عالمی کرکٹ کونسل سے مطالبہ کیا تھا کہ وہ اس میچ کے لیے کوئی اور امپائر مقرر کریں۔

کرکٹ ماہرین کے مطابق بکنر نے سڈنی ٹیسٹ میچ میں دو متنازعے فیصلے دئے تھے جس پر کھلاڑیوں نے اعتراض کیا تھا۔کھلاڑیوں اور ماہرین کا کہنا ہےکہ سڈنی ٹسٹ میچ کے پہلے روز بکنر نے اینڈریو سمنڈز کو کیچ آؤٹ نہیں دیا۔ اس وقت آسٹریلیا کا سکور تیس تھا، بعد میں وہ ایک سو باسٹھ رن پر آؤٹ ہوئے۔ اسی طرح میچ کے آخری روز انہوں نے راہول ڈراویڈ کو غلط آؤٹ دیا۔

آسٹریلیا اور انڈیا کے درمیان پرتھ میں تیسرا ٹیسٹ میچ سولہ جنوری سے شروع ہوگا۔