بکنر ٹیسٹ کرکٹ میں سب سے زیادہ تجربہ کار امپائر ہیں

انڈیا کے کرکٹ بورڈ نے تیسرے ٹیسٹ میچ کے لیے سٹیو بکنر پر ’نا اہلی‘ کا الزام لگاتے ہوئے عالمی کرکٹ کونسل سے مطالبہ کیا تھا کہ وہ اس میچ کے لیے کوئی اور امپائر مقرر کریں۔

عالمی کرکٹ کونسل کے ترجمان نے کہا کہ کسی ٹیم کو کسی امپائر کی تقرری پر اعتراض کرنے کا حق نہیں۔ پرتھ کے میچ میں بکنر کے ساتھ پاکستان سے تعلق رکھنے والے اسد رؤف امپائرنگ کریں گے۔

بکنر عالمی کرکٹ میں سب سے زیادہ تجربہ کار امپائر ہیں۔ انہوں نے ایک سو بیس ٹیسٹ میچوں میں امپائرنگ کی ہے۔ وہ کرکٹ کے عالمی کپ کے پانچ فائنل مقابلوں میں بھی امپائر رہے ہیں۔

بکنر نے سڈنی ٹیسٹ میچ میں دو غلطیاں کی جو انڈیا کے خلاف گئیں۔میچ کے پہلے روز انہوں نے اینڈریو سمنڈز کو کیچ آؤٹ نہیں دیاآ اس وقت ان کا سکور تیس تھا، بعد میں وہ ایک سو باسٹھ رن پر آؤٹ ہوئے۔ میچ کے آخری روز انہوں نے راہول ڈراویڈ کو غلط آؤٹ دیا۔