عبدالرشید شکور بی بی سی اردو ڈاٹ کام، ملتان

	جمعہ کا میچ جیتنے کی صورت پاکستان سیریز بھی جیت لے گا

دونوں ٹیمیں جمعہ کو ملتان میں چوتھے ون ڈے انٹرنیشنل میں مدمقابل ہونے والی ہیں۔ پاکستان کو اس وقت پانچ میچوں کی سیریز میں دو ایک کی برتری حاصل ہے۔

لاہور میں پہلا ون ڈے 45 رنز سے ہارنے کے بعد پاکستان نے لاہور میں دوسرا ون ڈے 25 رنز سے اور فیصل آباد میں تیسرا ون ڈے چھ وکٹوں سے جیتا تھا۔

شعیب ملک کا کہنا ہے کہ ان کی ٹیم نے آخری دو ون ڈے میچوں میں جو کارکردگی دکھائی ہے اسے اگلے میچوں میں بھی برقرار رکھنے کی کوشش کرینگے اور یہ ان کے لیے سیریز جیتنے کا اچھا موقع ہے۔

	جنوبی افریقہ کو ژاک کیلس سے بڑے اسکور کی امید ہے

پاکستانی ٹیم کو اپنے تجربہ کار بیٹسمین یونس خان کی فارم سے تشویش ہے جنہوں نے ٹیسٹ سیریز میں دو سنچریاں بنائی تھیں لیکن تین ون ڈے میچوں میں وہ صرف 54 رنز اسکور کرسکے ہیں۔

اس سال جنوبی افریقہ کے خلاف ڈربن میں 93 رنز کی اننگز کھیلنے کے بعد سے وہ 9 اننگز میں کوئی نصف سنچری نہیں بناسکے ہیں۔

پاکستانی ٹیم کے لیفٹ آرم سپنر عبدالرحمن گروئن انجری کا شکار ہیں۔ میچ سے قبل ان کا فٹنس ٹیسٹ ہوگا۔

جنوبی افریقی ٹیم میں دو تبدیلیوں کا امکان ہے۔ مکی آرتھر نے آندرے نیل کو چارل لینگویٹ کی جگہ کھلائے جانے کا عندیہ دیا ہے جبکہ جسٹن کیمپ کی جگہ بائیں ہاتھ کے بیٹسمین جین پال ڈومینی کی شمولیت متوقع ہے۔

جنوبی افریقی ٹیم کے کوچ مکی آرتھر نے تسلیم کیا ہے کہ یہ میچ ان کے لیے بڑی اہمیت کا حامل ہے۔ انہوں نے کہا کہ اس دورے کے لیے انہوں نے ہدف مقرر کئےتھے۔ ٹیسٹ سیریز جیتنے کے بعد وہ چاہیں گے کہ ان کی ٹیم ون ڈے سیریز بھی جیتے۔

	پانچ میچوں کی سیریز میں پاکستان کو دو ایک کی برتری حاصل ہے

مکی آرتھر نے ژاک کیلس کی ون ڈے سیریز میں مایوس کن کارکردگی کے بارے میں کہا کہ کیلس ایک زبردست بیٹسمین ہیں وہ ان سے کل کے میچ میں بڑے اسکور کی توقع رکھتے ہیں۔

واضح رہے کہ ٹیسٹ سیریز میں تین سنچریوں کی مدد سے421 رنز بنانے والے کیلس تین ون ڈے میچوں میں صرف 21 رنز بناسکے ہیں۔

جنوبی افریقی ٹیم نے کراچی میں ون ڈے انٹرنیشنل کھیلنے سے انکار کردیا تھا۔ جب مکی آرتھر سے سکیورٹی کے بارے میں سوال کیاگیا تو انہوں نے کہا کہ آخری دو میچوں کی شکست کی وجہ سکیورٹی کے بارے میں کھلاڑیوں کی توجہ بٹ جانا نہیں ہے۔ یہ معاملہ ان کی انتظامیہ نے احسن طریقے سے نمٹایا ہے۔ سچ تو یہ ہے کہ پاکستانی ٹیم اچھا کھیلی ہے۔

مکی آرتھر نے پاکستانی وکٹوں کو براہ راست تنقید کا نشانہ بنانے کے بجائے یہ ضرور کہا کہ ماضی میں ان کی ٹیم نے پاکستان میں ون ڈے بھی اچھی وکٹوں پر کھیلے ہیں لیکن شاید پہلا میچ ہارنے کے بعد پاکستان نے یہ سوچا کہ اس کے پاس شاہد آفریدی اور شعیب ملک جیسے سپنرز موجود ہیں اور سپن ان کی قوت
ہے، لہذا انہوں نے اس طرح کی وکٹیں بنائیں۔ تاہم یہ بات بحث طلب ہے کہ طویل المیعاد منصوبہ بندی میں اس طرح کی وکٹیں ہونی چاہئیں یا نہیں؟

ملتان کے میچ میں نیوزی لینڈ کے بلی باؤڈن اور پاکستان کے علیم ڈار امپائرز ہیں۔