عبدالرشید شکور بی بی سی اردو ڈاٹ کام، ملتان

	جنوبی افریقہ نے چند دن پہلے ہی سکیورٹی کا خدشہ ظاہر کیا تھا

جنوبی افریقی ٹیم نے کراچی میں انتیس اکتوبر کو پانچواں اور آخری ون ڈے انٹرنیشنل نہ کھیلنے کا فیصلہ اپنے دو سکیورٹی افسران کی رپورٹ کی روشنی میں کیا ہے جنہیں منگل کے روز فیصل آباد کے ون ڈے کے فوراً بعد کراچی بھیجا گیا تھا۔

ان سکیورٹی افسران کو آج کراچی میں صوبائی سیکریٹری داخلہ بریگیڈیئر (ر) غلام محمد محترم کی جانب سے سکیورٹی پر تفصیلی بریفنگ دی گئی۔

اٹھارہ اکتوبر کو سابق وزیراعظم بے نظیر بھٹو کے جلوس میں ہونے والے بم دھماکوں کے بعد جنوبی افریقی کرکٹ ٹیم نے اپنا پاکستان کا دورہ جاری رکھنے کے باوجود اپنی سکیورٹی مزید مؤثر بنانے کے مطالبے کے ساتھ ساتھ انتیس اکتوبر کو کراچی میں ون ڈے کھیلنے کے بارے میں تحفظات ظاہر کیے تھے۔

پاکستان کرکٹ بورڈ کے نقطۂ نظر سے کراچی میں ون ڈے انٹرنیشنل کا انعقاد نہ ہونا اس لئے بھی اہمیت کا حامل ہے کیونکہ آئندہ سال اسے آسٹریلوی ٹیم کی میزبانی کرنی ہے جو پانچ سال قبل سکیورٹی کے خدشات کے سبب پاکستان آنے سے انکار کر چکی ہے اور اب جنوبی افریقی انکار کے بعد وہ بھی کراچی میں کھیلنے کے بارے میں تحفظات ظاہر کرسکتی ہے۔