مناء رانا بی بی سی اردو ڈاٹ کام، لاہور

	یہ فیصلہ غیر منطقی اور غیر منصفانہ ہے: خالد محمود

انٹرنیشنل ہاکی فیڈریشن کے مطابق اس ٹورنامنٹ کے نئے میزبان کا اعلان جلد کر دیا جائے گا۔

انٹرنیشنل ہاکی فیڈریشن اس ٹورنامنٹ کو دسمبر ہی میں کروانا چاہتی ہے اور اس کی میزبانی حاصل کرنے کے لیے بھارت اور ملائشیا آگے آگے ہیں۔ یہ دونوں ملک ویسے تو چمپئنز ٹرافی کے لیے کوالیفائی نہیں کرتے لیکن میزبانی ملنے پر ان کی شمولیت یقینی ہے اور اس صورت میں پاکستان کی ٹیم اس ٹورنامنٹ میں شرکت سے محروم ہو جائے گی۔

پاکستان ہاکی فیڈریشن نے اس متوقع فیصلے کو افسوسناک قرار دیا۔ پاکستان ہاکی فیڈریشن کے سیکریٹری سابق اولمپئن خالد محمود کا کہنا ہے اگرچہ انہیں انٹرنیشنل ہاکی فیڈریشن کے اس فیصلے کی توقع تھی لیکن اس اعلان سے انہیں بہت مایوسی ہوئی ہے۔ انہوں نے کہا کہ یہ فیصلہ غیر منطقی اور غیر منصفانہ ہے۔

خالد محمود کے مطابق انٹرنیشنل ہاکی فیڈریشن نے پی ایچ ایف کو فیصلہ کرنے سے پہلے اعتماد میں لینے کی کوشش بھی نہیں کی جو کہ ایک غلط رویہ ہے۔
خالد محمود کے مطابق چمپئنز ٹرافی کی منتقلی سے پاکستان کی ہاکی کو بہت نقصان پہنچنے گا۔ انہوں نے کہا کہ اس فیصلے سے پاکستانی ٹیم کا انٹرنیشنل شیڈول بھی متاثر ہوگا اور اولمپکس کے لیے تیاریوں کو زبردست دھچکا پہنچے گا۔
خالد محمود نے پاکستان میں سکیورٹی کا بہانہ بنا کر آسٹریلیا اور دیگر ممالک کے نہ آنے کے فیصلے پر سخت تنقید کی اور کہا کہ مغربی دنیا کے دہرے معیارات ہیں۔

اس وقت آسٹریلیا کی اے کرکٹ ٹیم پاکستان میں کھیل رہی ہے، انہیں سکیورٹی کا کوئی خدشہ نہیں تو ہاکی ٹیم کو کیا فکر لاحق ہے۔ انہوں نے اسے آسٹریلین ہاکی فیڈریشن کی سازش قرار دیا۔ انہوں نے کہا کہ آسٹریلیا نے ناصرف خود پاکستان آنے سے انکار کیا بلکہ دیگر ممالک کی رائے کو بھی متاثر کرنے کی کوشش کی۔

آسٹریلیا نے ناصرف خود پاکستان آنے سے انکار کیا بلکہ دیگر ممالک کی رائے کو بھی متاثر کرنے کی کوشش کی خالد محمود

خالد محمود نے بھارت اور ملائشیا کے رویے پر بھی تنقید کی۔ ان کا کہنا تھا کہ پاکستان سے اپنے ملک چمپئنز ٹرافی منتقل کرانے میں ان ممالک کا بھی ہاتھ ہے کیونکہ یہ اس کی میزبانی حاصل کرنا چاہتے ہیں۔

خالد محمود کے مطابق میگا ایونٹ کی پاکستان سے منتقلی پر ہونے والے مالی نقصان کا کوئی اندازہ تو انہوں نے نہیں لگایا لیکن اتنا ضرور ہے کہ اس سے پاکستان ہاکی فیڈریشن کو کافی مالی نقصان بھی ہوگا۔

خالد محمود نے کہا کہ پی ایچ ایف انٹرنیشنل ہاکی فیڈریشن کے اس فیصلے پر بھرپور احتجاج کرے گی۔