مناء رانا بی بی سی اردوڈاٹ کام لاہور

	دسمبر میں چیمپئن ٹرافی پاکستان میں ہو رہی ہے

پاکستان ہاکی فیڈریشن نے باصلاحیت کھلاڑیوں کی تلاش کے لیے ملک بھر سے سات ٹیموں پر مشتمل ٹیلنٹ ہنٹ ہاکی ٹورنامنٹ کروایا تھا۔

سات سے چودہ اگست تک ہونے والے اس ٹورنامنٹ کا فائنل لاہور اور فیصل آباد کی ٹیموں کے درمیان ہوا۔

فائنل تو بارش کے سبب بے نتیجہ رہا لیکن ٹورنامنٹ نتیجہ خیز رہا اور ٹورنامنٹ کے روح رواں چیف سلیکٹر خواجہ ذکا الدین کے بقول وہ اپنے مقاصد حاصل کرنے میں کامیاب ہوئے۔

خواجہ ذکا الدین نے کہا کہ چونکہ قومی ٹیم کے کھلاڑیوں کے متبادل موجود نہیں اس لیے وہ محنت نہیں کرتے۔

انہوں نے کہا کہ اس ٹورنامنٹ میں ان کھلاڑیوں کو موقع دیا گیا جو کسی وجہ سے نظر انداز ہوئے تھے اور انہیں اپنی صلاحیتوں کو منوانے کا موقع نہیں ملا۔ اس ٹورنامنٹ میں انہیں یہ موقع دیا گیا ہے۔ انہوں نے کہا کہ اس ٹورنامنٹ سے جو دس کھلاڑی حاصل ہوئے ہیں ان کو چمپئنز ٹرافی کے کیمپ میں رکھ کر ان کی تربیت کی جائے گی اور انہیں امید ہے کہ یہ قومی ٹیم کے کھلاڑیوں کی آنکھوں میں آنکھیں ڈال کر انہیں چیلنج کر سکیں گے۔

خواجہ ذکا الدین نے کہا کہ جب قومی ٹیم کے کھلاڑیوں کو اندازہ ہو گا کہ ان کا متبادل موجود ہے تو وہ یقیناً محنت کریں گے۔

خواجہ ذکا الدین نے کہا کہ اگر قومی ہاکی ٹیم کے کھلاڑی خود کو فٹ رکھیں اور محنت کریں تو وہ ہالینڈ اور جرمنی جیسی ٹیموں کو شکست دے سکتے ہیں۔

لاہور میں دسمبر میں ہونے والے چمپئنز ٹرافی ہاکی ٹورنامنٹ میں آسٹریلیا کی ٹیم کے علاوہ دنیائے ہاکی کی ٹاپ ٹیموں کی آمد متوقع ہے۔

آسٹریلیا نے سیکیورٹی کے اندیشے کے سبب اس میں شرکت نہ کرنے کا فیصلہ کیا ہے البتہ باقی ٹیموں نے ابھی ایسا کوئی خدشہ ظاہر نہیں کیا اور حال ہی میں چین میں ہونے والے انٹرنیشل ہاکی فیڈریشن کی ایگزیکٹو باڈی کے اجلاس میں پاکستان کی میزبانی کو برقرار رکھا گیا ہے۔