مناء رانا بی بی سی اردو ڈاٹ کام، لاہور

	ٹیم کا اعلان پاکستان ہاکی فیڈریشن کے صدر میر ظفر اللہ جمالی نے کیا

جولائی کے آغاز میں ماسکو میں ہونے والے ایک چار ملکی ٹورنامنٹ کو جیتنے والی پاکستان کی ٹیم سولہ رکنی تھی۔ چین جانے والی ٹیم میں دو تبدیلیاں کی گئیں ہیں، جبکہ دو کھلاڑیوں کا اضافہ کیا گیا ہے۔

پاکستانی ٹیم کے فل بیک عمران وارثی ٹرائلز کے دوران ان فٹ ہو جانے کی وجہ سے چین نہیں جا سکیں گے جبکہ فارورڈ شبیر احمد سلیکٹرز کا اعتماد حاصل نہیں کر سکے۔ شبیر کی جگہ نوجوان فارورڈ عباس حیدر کو ٹیم میں شامل کیا گیا ہے۔

دو جونیئر کھلاڑیوں رانا آصف اور محمد ارشد کو بھی ٹیم میں شامل کیا گیا ہے۔
ٹیم کا اعلان پاکستان ہاکی فیڈریشن کے صدر میر ظفر اللہ جمالی نے کیا۔ چیف سلیکٹر خواجہ ذکاءالدین بھی ان کے ساتھ تھے۔

ظفر اللہ جمالی نے امید ظاہر کی کہ ٹیم چین میں اچھی کارکردگی دکھائے گی۔
آسٹریلیا کے دسمبر میں پاکستان میں ہونے والی چیمپئنز ٹرافی میں شرکت سے انکار کو میر ظفر اللہ جمالی نے افسوس ناک قرار دیا۔ ’ہم نے انٹرنیشنل ہاکی فیڈریشن کے سامنے آسٹریلیا کے اس فیصلے پر شدید احتجاج کیا ہے۔‘

چین میں ہونے والے چار ملکی ٹورنامنٹ میں میزبان ملک کے علاوہ پاکستان ملائشیا اور آسٹریلیا کی ٹیمیں شرکت کر رہی ہیں۔ ٹورنامنٹ آٹھ سے بارہ اگست تک ہو گا۔

پاکستان کی ٹیم چار اگست کو ٹورنامنٹ میں شرکت کے لیے روانہ ہو گی۔ ٹیم ان کھلاڑیوں پر مشتمل ہے: سلمان اکبر، ناصر احمد، احسان اللہ، کاشف علی، ماجد خان، عمران خان، محمد عمران، رانا آصف، وقاص ظفر، مدثر، ریحان بٹ(کپتان)، یاسر اسلام، شکیل عباسی، طارق عزیز، اختر علی، وقاص شریف، محمد ارشد اور عباس حیدر۔