عبدالرشید شکور بی بی سی اردو ڈاٹ کام، کراچی

	ڈسپلن کی دھجیاں بکھیرنے والے کرکٹر کی ٹیم میں جگہ نہیں ہونی چاہئے

سابق ٹیسٹ کرکٹر رمیز راجہ نے بی بی سی سےبات کرتے ہوئے کہا کہ شعیب اختر کا کریئر سب کے سامنے ہے، وہ کارکردگی سے زیادہ فیلڈ سے باہر کی حرکتوں کی وجہ سے شہ سرخیوں میں رہے ہیں اور ہر دو تین ماہ کے بعد کوئی نہ کوئی تنازعہ سامنے آہی جاتا ہے۔

رمیز راجہ نے کہا کہ شائقین انہیں ہمیشہ معاف کرتے رہے ہیں اور پاکستان کرکٹ بورڈ بھی ان سے نرمی برتتے ہوئے یوٹرن لیتا رہا ہے۔ رمیز کے بقول حال ہی میں ان پر عائد کیا گیا جرمانہ صرف اس لئے معاف کیا گیا کہ کہیں وہ انڈین لیگ میں نہ چلے جائیں۔

رمیز راجہ کے مطابق اس واقعے نے پاکستانی ٹیم کو ایک بار پھر مشکل میں ڈال دیا ہے اور سب کی توجہ پاکستانی ٹیم کی طرف ہوگئی ہے اس واقعے سےماحول خراب ہوگیا ہے۔ رمیز راجہ اس سلسلے میں پاکستان کرکٹ بورڈ اور منیجمنٹ کو بھی برابر کا قصوروار سمجھتے ہیں۔

ڈسپلن پر سمجھوتہ  کئی ٹیموں میں بڑے بڑے کھلاڑی موجود ہیں لیکن ان کے کرکٹ بورڈز نے ڈسپلن کے معاملے میں کوئی سمجھوتہ نہیں کر رکھا جاوید میانداد

جاوید میانداد نے کہا کہ شعیب اختر پر عائد کیے جانے والے جرمانے کو ہٹانے کا کوئی جواز نہ تھا۔

’ کئی ٹیموں میں بڑے بڑے کھلاڑی موجود ہیں لیکن ان کے کرکٹ بورڈز نے ڈسپلن کے معاملے میں کوئی سمجھوتہ نہیں کر رکھا ہے لیکن پاکستان کرکٹ بورڈ کی باگ ڈور اب ایسے لوگوں کے ہاتھوں میں ہے جو اپنے مفاد کا ہی سوچ رہے ہیں اور انہوں نے کرکٹ کو تباہ کردیا ہے۔‘

سابق کپتان وقار یونس کے خیال میں ڈسپلن کی دھجیاں بکھیرنے والے کرکٹر کی ٹیم میں جگہ نہیں ہونی چاہئے۔