عبدالرشید شکور بی بی سی اردو ڈاٹ کام، کراچی

	محمد یوسف نے گزشتہ سال کیلنڈر ائر میں سب سے زیادہ رنز کا اکتیس سالہ عالمی ریکارڈ اپنے نام کیا تھا

پاکستانی ٹیم کے تربیتی کیمپ میں بدھ کو کھیلے جانے والے میچ میں محمد یوسف نے نہ صرف حصہ نہیں لیا بلکہ وہ اپنا کٹ بیگ بھی ساتھ لے گئے جو اس بات کا اشارہ تھا کہ وہ کیمپ میں مزید شرکت کا ارادہ نہیں رکھتے جو اتوار کو ختم ہونے والا ہے۔

محمد یوسف کے علاوہ ٹیم منیجر اور چیف سلیکٹر نے بھی اس معاملے پر یہی موقف اختیار کیا ہے کہ وہ والدہ کی بیماری کے سبب کیمپ سے چلے گئے ہیں۔ جب چیف سلیکٹر صلاح الدین صلو سے محمد یوسف کو ٹیم سے ڈراپ کیے جانے کی قیاس آرائیوں پر تبصرے کے لیے کہا گیا تو ان کا کہنا تھا کہ ان اطلاعات میں کوئی صداقت نہیں ہے۔ محمد یوسف سمیت ہر کرکٹر سلیکشن کے لیے زیر غور آئے گا۔

ٹوئنٹی ٹوئنٹی ورلڈ کپ کے لیے پاکستانی ٹیم کا اعلان دس اگست کومتوقع ہے۔
گزشتہ کئی روز سے پاکستانی ذرائع ابلاغ محمد یوسف کو ٹیم سے ڈراپ کرنے کے بارے میں خبریں شائع کر رہے ہیں جس کی پاکستان کرکٹ بورڈ تردید کر رہا ہے۔
تجزیہ نگاروں کا کہنا ہے کہ ٹوئنٹی ٹوئنٹی ورلڈ کپ سے محمد یوسف کو ڈراپ کیا جانا بہت بڑی غلطی ہوگی ۔ انضمام الحق کے جانے کے بعد ٹیم کی مڈل آرڈربیٹنگ کو یوسف جیسے تجربہ کار بیٹسمین کی اشد ضرورت ہے۔

محمد یوسف گزشتہ سال کے سب سے کامیاب بیٹسمین تھے جنہوں نے کیلنڈر ائر میں سب سے زیادہ رنز کا اکتیس سالہ عالمی ریکارڈ اپنے نام کیا اور جب انضمام الحق نے پاکستان کرکٹ ٹیم کی کپتانی چھوڑی تو جن کرکٹرز نے کپتانی کی خواہش ظاہر کی ان میں محمد یوسف بھی پیش پیش تھے لیکن قرعہ شعیب ملک کے نام نکلا۔