عبدالرشید شکور بی بی سی اردو ڈاٹ کام، کراچی

	’جس کھلاڑی کو ٹیم میں شامل کرنا چاہتا تھا وہ دلائل دے کر ملتا تھا‘

ہار کی وجہ انضمام کا آمرانہ رویہ تھا: اعجاز بٹ

سابق ٹیسٹ کرکٹر اعجاز بٹ کی سربراہی میں قائم کمیٹی نے اپنی رپورٹ میں کہا ہے کہ ورلڈ کپ میں پاکستانی ٹیم کی شکست کا بنیادی سبب انضمام الحق کی قیادت اور ان کا آمرانہ رویہ تھا۔

انضمام الحق نے بی بی سی کو ایک خصوصی انٹرویو میں کہا کہ کمیٹی میں شامل تینوں افراد ان کے بزرگ ہیں لیکن کسی کو بھی کپتانی کا تجربہ نہیں۔ ’ممکن ہے کہ ان افراد کو ان کی یہ بات کڑوی لگے کہ ان میں سے دو تو پاکستان کرکٹ بورڈ کے تنخواہ دار آفیشلز ہیں۔ ایک سابق ڈائریکٹر کرکٹ آپریشنز رہے ہیں، انہیں اسوقت خیال کیوں نہیں آیا جب وہ بقول ان کے کپتانی کے معاملے میں خود سری کر رہے تھے یا ان کا رویہ آمرانہ تھا۔کیا ان سے کسی کھلاڑی نے شکایت کی ہے؟‘

پہلے نرم ہونے کا الزام ہے  ساری زندگی یہ الزام لگایا جاتا رہا کہ وہ فیلڈ میں بہت نرم طبیعت ہیں اور کھلاڑیوں کو کچھ نہیں کہتے تھے لیکن اب یہ نیا الزام ان کے سر لگا دیا گیا ہے جو کسی طور بھی انصاف پر مبنی بات نہیں انضمام الحق

انضمام الحق نے کہا کہ ان کی کپتانی پر اعتراض کرنے والے یہ بھول گئے کہ ورلڈ کپ سے قبل ون ڈے میں وہ پاکستان کے سب سے کامیاب کپتان تھے۔
انضمام الحق نے اس الزام کو بھی مسترد کر دیا کہ انہوں نے سلیکٹرز کے سامنے ہٹ دھرمی دکھائی انہوں نے کہا کہ جس کھلاڑی کو وہ ٹیم میں شامل کرنا چاہتے تھے وہ انہیں دلائل دے کر ملتا تھا۔

سابق کپتان نے واضح کردیا کہ اپنے مستقبل کا فیصلہ وہ خود کریں گے کوئی انہیں کھیلنے یا نہ کھیلنے پر مجبور نہیں کرسکتا۔ سلیکٹرز کی مرضی ہوگی کہ وہ انہیں سلیکٹ کرتے ہیں یا نہیں لیکن یہ تحقیقاتی کمیٹی انہیں ڈکٹیٹ نہیں کرا سکتی۔

انضمام الحق نے کہا کہ پاکستانی کرکٹ میں یہ عام سی بات ہے کہ شکست پر ہر کوئی اپنے آپ کو بچانا چاہتا ہے لیکن انہوں نے کسی پر ملبہ نہیں ڈالا اور شکست کی ذمہ داری یہ کہہ کر قبول کی کہ ٹیم اچھا نہیں کھیلی اور ہارگئی۔