عبدالرشید شکور بی بی سی اردو ڈاٹ کام، کراچی

	کمیٹی مطابق انضمام کومیڈیا کی بھرپور حمایت حاصل رہی ہے

سٹینڈنگ کمیٹی کے چیئرمین رائے عزیزاللہ نے بی بی سی کو بتایا کہ کمیٹی نے انضمام الحق سے کہا کہ شکست کو قسمت کی خرابی اور گرین وکٹ کا نتیجہ قرار دینا غلط ہے اور جہاں تک میڈیا کی تنقید کا تعلق ہے تو یہ الزام بھی غلط ہے کیونکہ انہیں ہروقت میڈیا کی بھرپور حمایت حاصل رہی۔

سٹینڈنگ کمیٹی نے پاکستان کرکٹ بورڈ کے چیئرمین ڈاکٹر نسیم اشرف کے اس بیان کا بھی سختی سے نوٹس لیا ہے کہ پاکستان کرکٹ بورڈ کے اثاثوں کا جائزہ لینے کا کوئی بھی مجاز نہیں۔

رائے عزیزاللہ نے بی بی سی کو بتایا کہ ڈاکٹر نسیم اشرف نے پیر کے روز کمیٹی کے سامنے کہا کہ پاکستان کرکٹ بورڈ کو حکومت سے کوئی مالی مدد یا فنڈز نہیں ملتے جس پر انہیں بتایا گیا کہ کرکٹ کو جو بھی سپانسرشپ ملتی ہے وہ پاکستانی کرکٹ ٹیم کے نام پر ملتی ہے۔

انہیں بتایا گیا کہ پاکستان کرکٹ بورڈ کے پیٹرن انچیف صدر مملکت ہیں لہذا وہ صدر سےگزارش کرتے ہیں کہ پاکستان کرکٹ بورڈ کے اکاؤنٹس کا باقاعدہ آڈٹ اکاؤنٹنٹ جنرل آف پاکستان سے کرایا جائے۔

	کمیٹی نے نسیم اشرف کی بورڈ کے انتظامی ڈھانچے میں ردوبدل کو عجلت پسندی قرار دیا

رائے عزیزاللہ نے بتایا کہ ڈاکٹر نسیم اشرف پر یہ بات بھی واضح کی گئی ہے کہ وہ کرکٹرز سے فاصلہ رکھتے ہوئے نظم و ضبط قائم رکھنے میں ناکام رہے ہیں جس کی واضح مثالیں ان کا سمندر کے کناروں پر کرکٹرز کے ساتھ کرکٹ کھیلنا ہے۔

انضمام الحق سے میچ فکسنگ کے بارے میں بھی پوچھا گیا جس پر انہوں نے تمام الزامات کو یکسر مسترد کردیا۔