عبدالرشید شکور بی بی سی اردو ڈاٹ کام، کراچی

	نسیم اشرف پاکستان کے آنجہانی کوچ کی آخری رسومات میں شرکت کے لیے جمیکا جا رہے ہیں

دوسری جانب وزیراعظم شوکت عزیز نے کہا ہے کہ تین رکنی ٹیم جمیکا جاکر باب وولمر کی موت کی تحقیقات میں شریک ہوگی۔ اس ٹیم میں پاکستان کرکٹ بورڈ کا آفیشل، سفاتکار اور ایک تحقیقاتی افسر شامل ہو گا۔

ڈاکٹر نسیم اشرف کے پرسنل سیکریٹری عامر بلال نے بی بی سی کو بتایا کہ صدر مشرف نے ڈاکٹر نسیم اشرف پر اعتماد ظاہر کرتے ہوئے ان سے کہا ہے کہ وہ پاکستان کرکٹ کے معاملات کو پیشہ ورانہ انداز میں استوار کریں۔

ڈاکٹر نسیم اشرف نے صدر مشرف کا شکریہ ادا کرتے ہوئے اس عزم کا اظہار کیا ہے کہ وہ کرکٹ کی بہتری کے لیے اقدامات کریں گے۔

ڈاکٹر نسیم اشرف نے ورلڈ کپ میں پاکستانی ٹیم کی آئرلینڈ کے ہاتھوں شکست کے بعد پیدا ہونے والے شدید عوامی ردعمل کے بعد انیس مارچ کو اپنے عہدے سے استعفی دے دیا تھا لیکن ویسٹ انڈیز میں کوچ باب وولمر کی موت کے بعد جو حالات سامنے آئے اس کے پیش نظر صدر پرویز مشرف نے جو پاکستان کرکٹ بورڈ کے پیٹرن انچیف ہیں انہیں ہدایت کی تھی کہ وہ اپنے عہدے پر کام کرتے رہیں۔

ڈاکٹر نسیم اشرف گزشتہ سال ستمبر میں شہریارخان کی جگہ پاکستان کرکٹ بورڈ کی ایڈہاک کمیٹی کے چیئرمین بنائے گئے تھے۔

ورلڈ کپ میں ٹیم کی شکست کے بعد کپتان انضمام الحق قیادت سے مستعفی ہونے کے ساتھ ساتھ ایک روزہ بین الاقوامی کرکٹ سے ریٹائرمنٹ کا اعلان کرچکے ہیں جبکہ وسیم باری کی سربراہی میں قائم سلیکشن کمیٹی بھی مستعفی ہوچکی ہے۔

ڈاکٹر نسیم اشرف آئندہ چند روز میں جنوبی افریقہ جارہے ہیں جہاں وہ چار اپریل کو کیپ ٹاؤن میں باب وولمر کی آخری رسومات میں شرکت کرینگے۔ پاکستان کرکٹ بورڈ نے یکم اپریل کو لاہور کے گرجا گھر میں بھی باب وولمر کے لیے خصوصی دعا کا اہتمام کیا ہے۔