مناء رانا بی بی سی اردو ڈاٹ کام، لاہور

	’سو فیصد فٹ شعیب ٹیم کے دوسرے کھلاڑیوں ہی کی طرح ہیں‘

بی بی سی اردو ڈاٹ کام سے بات کرتے ہوئے ان کا کہنا تھا کہ’ٹیم کے لیے پہلی ترجیح تو یہی دونوں بالرز ہیں تاہم ان کے نہ ہونے کی صورت میں متبادل کھلاڑیوں پر انحصار کرنا ہوگا‘۔

انہوں نے کہا کہ شعیب اور آصف کی غیر موجودگی میں ان کے متبادل کھلاڑیوں پر ان جیسی بہتر کارکردگی دکھانے کے حوالے سے کافی دباؤ رہےگا لیکن ٹیم کو ان دونوں کے بغیر رہنا سیکھ لینا چاہیے۔ باب وولمر نے کہا کہ ان کے دل میں شعیب اختر کے لیے کوئی بغض نہیں اور سو فیصد فٹ شعیب ان کے لیے ٹیم کے دوسرے کھلاڑیوں ہی کی طرح ہیں۔

پاکستان کرکٹ ٹیم کے کوچ باب وولمر کا کہنا ہے کہ فاسٹ بالر عمرگل فٹ ہوگئے ہیں اور محمد آصف کی کہنی میں بھی اب کوئی تکلیف نہیں لہذٰا وہ ٹیم کی فٹنس کی بابت زیادہ پریشان نہیں ہیں۔انہوں نے کہا کہ ٹیم کا فٹنس لیول کافی حد تک بہتر ہے البتہ شعیب اختر کی فٹنس کے بارے میں باب وولمر یقین سے کچھ کہنے سے قاصر ہیں کیونکہ شعیب نےانہیں اپنی فٹنس کے بارے میں آگاہ نہیں کیا۔

ہمارا چانس بھی ہے  عالمی کپ بالکل مختلف ٹورنامنٹ ہے اور پاکستان کے عالمی کپ جیتنے کے اتنے ہی امکانات ہیں جتنے کہ کسی بھی اور ٹیم کے باب وولمر

انہوں نے کہا کہ جنوبی افریقہ کے دورے سے ٹیم نے بہت کچھ سیکھا ہے جس کا فائدہ عالمی کپ میں ہوگا۔ باب وولمر کے مطابق اگرچہ جنوبی افریقہ کے خلاف کارکردگی کی بناء پر لوگ پاکستان کی ٹیم سے کم توقعات رکھتے ہیں لیکن عالمی کپ بالکل مختلف ٹورنامنٹ ہے اور پاکستان کے عالمی کپ جیتنے کے اتنے ہی امکانات ہیں جتنے کہ کسی بھی اور ٹیم کے۔ انہوں نے کہا کہ آسٹریلیا کی موجودہ کارکردگی کےسبب اب اسے بھی فیورٹ نہیں سمجھا جا سکتا۔

جمعہ سے قذافی سٹیڈیم لاہور میں عالمی کپ کے لیے پاکستانی ٹیم کا تربیتی کیمپ شروع ہو رہا ہے اور باب وولمر کے مطابق کھلاڑیوں کو اس کیمپ میں انتہائی سنجیدگی سے تربیت کرنا ہوگی۔ انہوں نے کہا کہ کیمپ میں تربیت کے لیے صرف پانچ چھ روز ملیں گے لہذٰا ان دنوں میں سخت محنت کرنا ہوگی۔

اوپنگ کے مسئلے کی بابت باب وولمر کا کہنا تھا کہ یہ مسئلہ پاکستان کے ساتھ ہی نہیں دوسری ٹیموں کے ساتھ بھی ہے۔ انہوں نے بتایا کہ عالمی کپ میں اوپننگ کی ذمہ داری محمد حفیظ، عمران نذیر اور کامران اکمل بانٹیں گے اور یہ تینوں ہی زبردست بیٹسمین ہیں، صرف ضرورت اس بات کی ہے کہ تینوں عالمی کپ میں ذمہ داری کا ثبوت دیں۔

باب وولمر کا پاکستان کی ٹیم کے ساتھ عالمی کپ آخری ٹورنامنٹ ہو سکتا ہے کیونکہ اس کے بعد ان کا پاکستان کرکٹ بورڈ کے ساتھ معاہدہ ختم ہو جائے گا انہوں نے کہا کہ ان کی خواہش ہے کہ ان کی کوچنگ میں پاکستان کی ٹیم عالمی کپ کی فاتح ہو۔