شعیب کا باب وولمر سے تلخی کلامی کاواقعہ ٹی وی پر بھی دیکھا گیا

شیعب اختر اور عمر گل کو منگل کو جنوبی افریقہ کے شہر پورٹ الزبتھ سے جوہنس برگ روانہ کر دیا گیا جہاں سے وہ پاکستان جانے کے لیئے بین الاقوامی پرواز پر سوار ہوں گے۔

پورٹ الزبتھ سے صحافی قمر احمد نے اطلاع دی ہے کہ شعیب اختر کی باب وولمر سے دوسرے ٹیسٹ کے دوران تلخ کلامی بھی شعیب کی ’انجری‘ کی وجہ سے ہوئی تھی۔

تاہم ان کو وطن واپس بھیجنے کا فیصلہ ان کا پٹھ چڑھ جانے کے باعث کیا گیا ہے۔

شعیب اختر کے گھٹنے اور ہیمسٹرنگ انجری کی نوعیت کے پیش نظر شیعب کی آئندہ ماہ ہونے والے ورلڈ کپ میں شرکت پر بھی شدید شکوک و شبہات ظاہر کیئے جارہے ہیں۔ البتہ عمر گل کے ورلڈ کپ تک مکمل طور پر صحت یاب ہوجانے کے قوی امکان ہیں۔

جنوبی افریقہ کے خلاف ایک روزہ میچوں میں ان دونوں کھلاڑیوں کی جگہ پاکستان کرکٹ بورڈ تیز رفتار بالر شبیر احمد، آل راونڈر شاہد آفریدی یا نوجوان کھلاڑی عبدالرحمان کو طلب کرنے پر غور کر رہا ہے۔

پاکستان سے بلائے جانے والے کھلاڑی، جنوبی افریقہ کے خلاف آخری ٹیسٹ میچ میں شامل نہیں ہو سکیں گے اور پاکستان ٹیم کو جنوبی افریقہ میں موجود کھلاڑیوں پر ہی انحصار کرنا پڑے گا۔