سٹیو وا دو ہزار چار میں کرکٹ سے ریٹائر ہو گئے تھے

وا کے علاوہ والابیز رگبی یونین کے کپتان جوہن آلیس اور پیراکی میں طلائی تمغہ حاصل کرنے والی سوسئی اونیل بھی چین جانے والے ایتھلیٹس کے آسٹریلوی دستے کے رابطہ افسروں میں شامل ہوں گی۔

آسٹریلوی اولمپکس کمیٹی کے سربراہ جوہن کوایٹس کا کہنا ہے کہ ’سٹیو نہ صرف چمپئن ایتھلیٹس ہیں بلکہ تحریک پیدا کرنے والے لیڈر بھی ہیں‘۔

ان کا کہنا ہے کہ ’سوسئی، جوہن اور سٹیو کے پاس بے پناہ تجربہ ہے‘۔

سٹیو وا دو ہزار چار میں کرکٹ سے ریٹائر ہو گئے تھے اور انہوں نے 168 ٹیسٹوں میں دس ہزار نو سو ستائس رنز بنائے تھے۔

انہوں نے ستاون ٹیسٹوں اور ایک سو چھ ایک روزہ میچوں میں اپنی ٹیم کی قیادت کی۔

آلس کی قیادت میں آسٹریلیا نے رگبی میں 1999 کا ورلڈ کپ جیتا۔ اس کے علاوہ وہ ایتھنز کے 2004 اولمپکس میں بھی آسٹریلیا کے لیے خدمات انجام دے چکے ہیں۔

سوسئی اونیل نے 1996 کے اٹلانٹا گیمز میں دو سو میٹر کا بٹرفلائی مقابلہ جیتا اور اس کھیل میں انہیں 2000 کے سڈنی اولمپکس تک کوئی نہیں ہرا سکا۔ انہوں نے سڈنی اولمپکس دو سو میٹر کے فری سٹائل مقابلوں میں طلائی تمغہ حاصل کیا۔