ایشول پرنس نصف سنچری مکمل کر کے ناٹ آؤٹ رہے

پاکستان نےفتح کے لیے جنوبی افریقہ کو 161 رن کا ہدف فراہم کیا تھا جو اس نے ایشول پرنس اور ژاک کیلس کی عمدہ بیٹنگ کی بدولت تیسرے دن کھانے کے وقفے کے بعد حاصل کر لیا۔

تفصیلی سکور کارڈ

کیپ ٹاؤن ٹیسٹ: تصاویر

پرنس اور کیلس نے اپنی نصف سنچریاں بھی مکمل کیں۔ ان دونوں بلے بازوں کے درمیان ایک سو سترہ رن کی پارٹنر شپ ہوئی۔ کیلس آؤٹ ہونے والے آخری جنوبی افریقی کھلاڑی تھے جنہیں اکیاون کے انفرادی سکور پر شاہد نذیر نے بولڈ کیا جبکہ ایشول پرنس نصف سنچری مکمل کر کے ناٹ آؤٹ رہے۔

تیسرے دن جب کھیل شروع ہوا تو جنوبی افریقہ کو فتح کے لیے 125 رن درکار تھے اور اس کی آٹھ وکٹیں باقی تھیں تاہم محمد آصف نے ابتداء میں ہی دو وکٹیں حاصل کر کے میچ دلچسپ بنا دیا۔ کپتان گریم سمتھ تینتیس رن بنا کر ایل بی ڈبلیو ہوئے جبکہ ہاشم آملہ آصف ہی کی کیند پر کامران اکمل کے ہاتھوں کیچ ہوئے۔ وہ تین رن بنا سکے۔

دوسرے دن جب کھیل ختم ہوا تھا تو جنوبی افریقہ نے دو وکٹوں کے نقصان پر چھتیس رن بنائے تھے۔ اس سے قبل ٹیسٹ میچ کے دوسرے دن پاکستانی ٹیم اپنی دوسری اننگز میں ایک سو چھیاسی رن بنا کر آؤٹ ہو گئی تھی اور یوں اس نے جنوبی افریقہ کو جیتنے کے لیے ایک سو اکسٹھ رن کا ہدف دیا تھا۔

	محمد آصف نے ابتدائی اوور ز میں دو وکٹیں حاصل کر کے میچ مزید دلچسپ بنا دیا

اس سے قبل جنوبی افریقہ کی ٹیم پہلی اننگز میں 183 رن بنا کر آؤٹ ہو گئی تھی اور اس طرح اسے پاکستان پر چھبیس رن کی برتری حاصل ہوئی۔ پاکستان نے پہلی اننگز میں 157 رن بنائے تھے۔

جنوبی افریقہ نے ٹاس جیت کر پاکستان کو پہلے بیٹنگ کی دعوت دی تھی۔ اس میچ کے لیے پاکستان نے اپنی ٹیم میں صرف ایک تبدیلی کی ہے جبکہ جنوبی افریقہ نے اپنی ٹیم میں تین تبدیلیاں کیں۔

پاکستان نے فاسٹ بولر شعیب اختر کی جگہ شاہد نذیر کو ٹیم میں شامل کیا جبکہ جنوبی افریقہ نے فاسٹ بولر آندرے نیل، آل راؤنڈر شان پولاک اور ہرشل گبز کی جگہ ایچ ڈپینور، ڈیل سٹین، اور اینڈریو ہال کو ٹیم میں شامل کیا۔

پاکستان کی ٹیم : انضمام الحق (کپتان) ، یونس خان ، عمران فرحت، محمد حفیظ، یاسر حمید، محمد یوسف، کامران اکمل، محمد سمیع، شاہد نذیر، محمد آصف اور دانش کنریا۔

جنوبی افریقہ : جی سی سمتھ، ڈیپینر، ایچ ایم آملہ، ژاک کالِس، اے جی پرِنس، اے بی ولیئر، ایم وی باؤچر، اینڈریو ہال، سٹینز، ایم نتینی اور پال ہیرس