مناء رانا بی بی سی اردو ڈاٹ کام، لاہور

	عمران نذیر کو انضمام الحق کے اصرار پر کیمپ میں بلایا گیا تھا

ان کھلاڑیوں میں شبیر احمد، عبدالرزاق، شاہد آفریدی، عبدالرحمن اور عمران نذیر شامل ہیں۔

یہ کھلاڑی جنوبی افریقہ میں موجود پاکستانی ٹیم میں شامل ہو جائیں گے جبکہ
ٹیسٹ سیریز کے لیے بھیجی گئی ٹیم میں سے چار کھلاڑی فیصل اقبال، دانش کنیریا، عاصم کمال اور شاہد نذیر پاکستان واپس آ رہے ہیں۔

پاکستان کرکٹ بورڈ کے مطابق ٹیسٹ ٹیم کا ایک کھلاڑی ٹیسٹ سیریز کے خاتمے پر واپس آئے گا۔ یہ کھلاڑی کون ہوگا اس کا نام نہیں بتایا گیا البتہ امکان ہے کہ واپس آنے والے پانچویں کھلاڑی اوپنر عمران فرحت ہو سکتے ہیں۔

فاسٹ بالر شبیر احمد اور عبدالرزاق کو فٹنس ٹیسٹ پاس کرنے کے بعد جنوبی افریقہ بھجوایا جا رہا ہے۔ شبیر احمد نے جمعہ کو جمخانہ لاہور کی جانب سے سوامی نگر سپورٹس کے خلاف دو روزہ میچ کھیلتے ہوئے پانچ کھلاڑیوں کو پویلین کی راہ دکھائی اور اپنی فٹنس ثابت کی جبکہ عبدالرزاق نے قائداعظم ٹرافی کے ایک میچ میں لاہور راوی کی جانب سے کھیلتے ہوِئے پندرہ رنز بنائے اور ایک کھلاڑی کو آؤٹ کیا۔

عبدالرزاق خود اپنی فٹنس کے بارے میں پوری طرح مطمئن ہیں اور ان کا کہنا ہے کہ وہ جنوبی افریقہ کے خلاف بہتر کارکردگی کا مظاہرہ کریں گے۔ عمران نذیر کو بھجوانے کی وجہ سلیکشن کمیٹی نے ڈومیسٹک کرکٹ میں ان کی کارکردگی بتائی ہے۔

عمران نذیر کا نام جنوبی افریقہ کے کیمپ کے 25 کھلاڑیوں میں بھی نہیں تھا البتہ جب کیمپ شروع ہوا تو وہ بھی پریکٹس کے لیے کیمپ آئے اور کپتان انضمام الحق کا کہنا تھا کہ عمران کو انہوں نے خود بلایا ہے۔ یہ خبر بھی گردش کرتی رہی کہ کپتان انضمام عمران نذیر کو ٹیسٹ سکواڈ کا حصہ بھی بنانا چاہتے تھے لیکن ایسا نہ ہوا تاہم اب عمران نذیرکو ایک روزہ سکواڈ میں شامل کر لیا گیا ہے۔