عبدالرشید شکور بی بی سی اردو ڈاٹ کام، کراچی

	شعیب پر دو اور آصف پر ایک سال کی پابندی لگائی گئی تھی

شعیب اختر اور محمد آصف کو پاکستان کرکٹ بورڈ کے اینٹی ڈوپنگ کمیشن نے ممنوعہ دوا نیندرولون استعمال کرنے پر بالترتیب دو اور ایک سالہ پابندی کی سزا سنائی تھی، لیکن دونوں کی اپیل پر پاکستان کرکٹ بورڈ ہی کے قائم کردہ اپیلٹ ٹریبونل نے یہ پابندی ختم کردی تھی۔

انٹرنیشنل کرکٹ کونسل نے شعیب اور آصف کے ڈوپنگ کے معاملے سے نمٹنے کے پی سی بی کے طریقہ کار پر افسوس کا اظہار تو کیا تھا لیکن کسی قسم کی کارروائی کرنے کا اشارہ نہیں دیا تھا۔ تاہم واڈا نے اعلان کیا تھا کہ وہ اس معاملے کو کھیلوں کی عالمی ثالثی عدالت میں اٹھائے گی۔

اپیل دائر کرنے کے بعد واڈا کے ترجمان فریڈرک ڈونز نے ایک بیان میں کہا ہے کہ یہ اینٹی ڈوپنگ ایجنسی کے طے کردہ کردار کے مطابق ہے۔ ان کا کہنا تھا کہ کھیلوں کو ممنوعہ ادویات سے پاک رکھنا واڈا کی ذمہ داری ہے۔

واڈا کے ترجمان کے مطابق شعیب اختر اور محمد آصف کے بارے میں فیصلہ آئی سی سی کو کرنا ہے کہ آیا وہ کرکٹ کھیل سکتے ہیں یا نہیں۔

پاکستان کرکٹ بورڈ کے چیئرمین ڈاکٹر نسیم اشرف کہہ چکے ہیں کہ دونوں فاسٹ بالرز کو ڈوپنگ کے الزام سے بری کیا جانا پاکستان کا اندرونی معاملہ ہے، جس پر واڈا اور آئی سی سی کو کارروائی کرنے کا کوئی اختیار نہیں۔