عبدالرشید شکور بی بی سی اردو ڈاٹ کام، کراچی

	پاکستان باکسنگ فیڈریشن مہراللہ اور فیصل کریم پر پہلے ہی تاحیات پابندی عائد کر چکی ہے

آئبا نے یہ قدم ورلڈ اینٹی ڈوپنگ ایجنسی( واڈا ) کے عدم اطمینان کے بعد اٹھایا ہے جس نے دونوں باکسرز پر عائد چھ ماہ کی پابندی کو ناکافی قرار دیتے ہوئے باکسنگ کی عالمی ایسوسی ایشن سے مزید سخت سزا کے لیے کہا تھا جس پر پابندی کی مدت چھ ماہ سے بڑھا کر دو سال کر دی گئی ہے۔

واڈ کے قوانین کے تحت ڈوپ ٹیسٹ مثبت ثابت ہوجانے کے بعد کم ازکم سزا دو سال ہے۔

پاکستان باکسنگ فیڈریشن مہراللہ اور فیصل کریم پر پہلے ہی تاحیات پابندی عائد کر چکی ہے۔

مہراللہ اور فیصل کریم اس سال اگست میں کولمبو میں منعقدہ ساؤتھ ایشین گیمز میں ممنوعہ ادویات کے استعمال کے مرتکب قرار پائے تھے مثبت ڈوپ ٹیسٹ کے نتیجے میں ساؤتھ ایشین گیمز کے منتظمین نے دونوں باکسرز پر چھ ماہ کی پابندی لگادی تھی۔

حالیہ برسوں کے دوران پاکستانی باکسرز میں چرس اور دیگر نشہ آور اشیا کا استعمال عام ہوچکا ہے اور مستقبل قریب میں مزید پاکستانی باکسرز کے ڈوپ ٹیسٹ میں پکڑے جانے کی صورت میں پاکستان باکسنگ فیڈریشن پر بھی پابندی لگ سکتی ہے۔