گلین میکگرا نے نیوزی لینڈ کی اننگز کے شروعات میں ہی بائیس رنز دے کر تین وکٹیں حاصل کیں

موہالی میں کھیلے جانے والے اس میچ کو جیت کر آسٹریلیا کی ٹیم اب مقابلے کے فائنل میں پہنچ گئی ہے۔

مکمل سکور کارڈ

بدھ کے سیمی فائنل میں نیوزی لینڈ نے ٹاس جیت کر پہلے بولنگ کرنے کا فیصلہ کیا۔ آسٹریلیا کی اننگز کا ابتدا اچھا نہیں تھا اور تیسرے اوور میں آسٹریلیا کے دو کھلاڑی صرف چار رنز کے سکور پر آوٹ ہو چکے تھے۔ یہ دونوں وکٹیں کائل مِلز نے حاصل کیں۔

آسٹریلیا کی ٹیم نے اپنے مقررہ اوورز میں نو وکٹوں کے نقصان پر 240 رنز بنائے جس میں کپتان رِکی پونٹنگ کے 58 اور اینڈریو سِمنڈز کے 58 شامل تھے۔

نیوزی لینڈ کو جیتنے کے لیے 241 رنز درکار تھے لیکن اس کی پوری ٹیم صرف 46 اوورز میں 204 رن کے سکور پر آؤٹ ہو گئی۔

آسٹریلیا کے گلین میکگرا نے مسلسل دس اوور کرائے جن میں انہوں نے بائیس رنز دے کر تین وکٹیں حاصل کیں۔ ایک وقت میں نیو زی لینڈ کی ٹیم کا سکور چھ وکٹوں کے نقصان پر صرف پینتیس تھا لیکن پھر ڈینیئل ویٹوری اور جیکب اورام نے ساتھویں وکٹ کی شراکت میں 103 قیمتی رنز بنائے جس میں متعدد چوکے بھی شامل تھے۔

نیوزی لینڈ نے یہ مقابلہ چھ سال پہلے کینیا میں جیتا تھا۔

ٹرافی کا دوسرا سیمی فائنل جئے پور میں جمعرات کو موجودہ چیمئن ویسٹ انڈیز اور جنوبی افریقہ کے درمیان کھیلا جائے گا۔