عبدالرشید شکور، مناء رانا بی بی سی اردو ڈاٹ کام، کراچی/ لاہور

	یونس انضمام کی جگہ دو ٹیسٹ اور ون ڈے میچوں میں قیادت کے فرائض انجام دے چکے ہیں

کپتانی: انضمام شہریارملاقات

یونس خان نے جنہیں انضمام الحق کی جگہ چیمپئنز ٹرافی کے لیئے کپتان مقرر کیا گیا تھا کہا کہ ’میں نے کرکٹ بورڈ کو بتا دیا ہے کہ میں کپتانی سے انکار کررہا ہوں اور میں ڈمی کپتان نہیں بننا چاہتا ہوں چاہے ایک میچ کے لیئے ہو، دو یا چھ میچوں کے لیئے‘۔یونس خان یہ کہہ کر کرکٹ اکیڈمی چلے گئے۔

اس کے بعد قذافی اسٹیڈیم میں صحافیوں سے بات کرتے ہوئے باب وولمر نے کہا کہ یہ فیصلہ ان کے لئے انتہائی مایوس کن ہے۔ ان کے مطابق یونس خان نے انہیں کپتانی چھوڑنے کی وجہ ذاتی بتائی ہے۔ باب وولمر نے کہا کہ ان کا کام ٹیم کی تیاری ہے اور اس وقت ٹیم کے سامنے چیمپئنز ٹرافی اور ورلڈ کپ ہے جو متاثر نہیں ہوگی اور وہ اپنا کام کرتے رہیں گے۔ باب وولمر کا کہنا ہے کہ صورتحال کے بارے میں باضابطہ بیان کرکٹ بورڈ جاری کرے گا۔

یونس خان کے جانے کے کچھ دیر بعد پاکستان کرکٹ بورڈ کے ڈائریکٹر سلیم الطاف اور ٹیم کے منیجر طلعت علی ان سے مذاکرات کے لیئے اکیڈمی میں گئے لیکن یہ مذاکرات نتیجہ خیز ثابت نہیں ہوسکے۔

خیال کیا جاتا ہے کہ یونس خان کے کپتانی چھوڑنے کے اچانک فیصلے کے پیچھے دو وجوہات ہوسکتی ہیں۔ ایک یہ کہ انضمام الحق کی جگہ متبادل کھلاڑی کے انتخاب کے معاملے میں انہیں اعتماد میں نہیں لیا گیا۔

یہ بات یونس خان کو بری لگی ہو اور انہوں نے محسوس کیا ہو کہ ان کی کپتانی برائے نام ہے لہذا انہوں نے کپتانی نہ کرنے کا فیصلہ کرلیا مبصرین

دوسرا اہم سبب منیجر طلعت علی کا تازہ ترین بیان بھی ہوسکتا ہے جس میں انہوں نے کہا ہے کہ اگر پاکستانی ٹیم چیمپئنز ٹرافی کے فائنل تک رسائی حاصل کرتی ہے تو اس بات کا امکان ہے کہ کسی کھلاڑی کے ان فٹ ہونے کی صورت میں انضمام الحق کی ٹیم میں واپسی ہوجائے جو اس وقت چار میچوں کی پابندی کی زد میں ہیں۔

مبصرین کا کہنا ہے کہ یہ بات یونس خان کو بری لگی ہو اور انہوں نے محسوس کیا ہو کہ ان کی کپتانی برائے نام ہے لہذا انہوں نے کپتانی نہ کرنے کا فیصلہ کرلیا۔

یونس خان ماضی میں انضمام الحق کی جگہ دو ٹیسٹ اور ون ڈے انٹرنیشنل میچوں میں قیادت کے فرائض انجام دے چکے ہیں۔

قیادت چھوڑنے کا اعلان کرنے کے بعد سے یونس خان میڈیا کے رابطے میں نہیں آرہے ہیں۔