مناء رانا بی بی سی اردو ڈاٹ، لاہور

	یونس خان نے کہا کہ ان کی پاکستان کی ٹیم کی کپتانی کرنے کی کبھی خواہش نہیں رہی۔

پاکستان کے نئے کپتان محمد یوسف

چئرمین پی سی بی نے کہا کہ ایڈہاک کمیٹی سے مشورے کے بعد محمد یوسف کو کپتان اور عبدالرزاق کو نائب کپتان مقرر کر دیا گیا ہے۔

انہوں نے کہا کہ انہیں یونس خان کے فیصلے پر افسوس ہوا ہے اور یہ اعلان یونس نے بورڈ کو پہلے مطلع کیے بغیر کیا۔

یونس خان نے کہا کہ وہ اب بھی اپنے مؤقف پر قائم ہیں اور ان کا پاکستان کی ٹیم کا چمپئنز ٹرافی میں قیادت کرنے کا کوئی ارادہ نہیں۔ ان کے خیال میں انہوں نے یہ اعلان کرنے میں دیر کی، تاہم ان کا کہنا تھا کہ وہ کھلاڑی کی حثیت سے ٹیم کو ہمیشہ دستیاب رہیں گے اور ٹیم کے لیے ویسی ہی کارکردگی دکھاتے رہیں گے جیسی کہ ہمیشہ دکھائی ہے۔

یونس خان نے صحافیوں کے بےحد اصرار کے باوجود یہ نہیں بتایا کہ آخرانہوں نے پہلے یہ اعلان کیوں کیا تھا کہ وہ ڈمی کپتان نہیں بننا چاہتے۔ انہوں نے کوئی خاطر خواہ جواب نہیں دیا اور کہا کہ انہوں نے تمام وجوہات سے پی سی بی کے چئرمین کو آگاہ کر دیا ہے اور وہ اب خود میڈیا کو ہینڈل کریں۔

یونس خان نے کہا کہ ان کی پاکستان کی ٹیم کی کپتانی کرنے کی کبھی خواہش نہیں رہی۔

پی سی بی کے چئرمین نے بھی اس معاملے کو دبانے کی کوشش کی اور کہا کہ یونس نے اپنی ذاتی وجوہات کے سبب کپتانی سے انکار کیا ہے۔ شہر یار خان نے کہا کہ یونس خان نے کبھی نظم و ضبط کی خلاف ورزی نہیں کی اور آج بھی انہوں نے صحافیوں کے سامنے پی سی بی کو اعتماد میں لیے بغیر کپتانی چھوڑنے کا جو اعلان کیا تھا اس پر معذرت کر لی ہے لہذا ان کے خلاف ابھی کوئی کاروائی نہیں کی جا رہی۔

شہر یار خان نے کہا کہ اس میں کوئی شبہ نہیں کہ اس وقت جبکہ چمپئنز ٹرافی میں چند دن باقی ہیں یونس خان کے اس اعلان سے ٹیم کو دھچکا پہنچا ہے لیکن انہوں نے یونس خان، محمد یوسف اور عبدالزاق کے ساتھ بات کی ہے جنہوں نے یقین دہانی کرائی ہے کہ ٹیم اسی سپرٹ کا مظاہرہ کرے گی جو اس واقعہ سے پہلے تھی۔

شہریار خان نے مزید کہا کہ ہار جیت سے قطع نظر ٹیم اچھی کارکردگی دکھائے گی۔