عبدالرشید شکور بی بی سی اردو ڈاٹ کام، کراچی

	شہناز شیخ سنہ اٹھانوے۔ ننانوے اور دو ہزار تین میں بھی کوچ رہ چکے ہیں

شہناز شیخ کو پاکستانی ہاکی ٹیم کی انتہائی مایوس کن کارکردگی کے بعد آصف باجوہ کی جگہ ورلڈ کپ کے لئے کوچ مقرر کیا گیا تھا۔ جس کے بعد ورلڈ کپ میں پاکستان نے چھٹی پوزیشن حاصل کی۔

شہناز شیخ نے بی بی سی سے بات کرتے ہوئے بتایا کہ پاکستان ہاکی فیڈریشن کے سیکریٹری اخترالاسلام نے ورلڈ کپ کے دوران ان سے مستقبل میں بھی کوچ کی ذمہ داری جاری رکھنے کی بات کی تھی۔ ان کا خیال ہے کہ چونکہ ایشین گیمز میں وقت بہت کم ہے لہذا کارکردگی میں تسلسل برقرار رکھنے کے لئے وہ کوچ کے فرائض انجام دیتے رہیں گے۔

شہناز شیخ کا کہنا ہے کہ وہ جدہ میں پی آئی اے سے وابستہ ہیں اور وہ اپنے ادارے اور فیملی سے اس بارے میں بات کرکے ہی کوچ کے فرائض انجام دینے کے بارے میں حتمی فیصلہ کرینگے۔

شہناز شیخ کے خیال میں بیجنگ اولمپکس کو ذہن میں رکھتے ہوئے کم از کم چار کھلاڑیوں کی تبدیلی ناگزیر ہے

شہناز شیخ کہتے ہیں کہ ورلڈ کپ میں پاکستانی ٹیم کی کارکردگی کو اگر بہت اچھا نہیں تو بہت خراب بھی نہیں کہا جا سکتا۔ ورلڈ کپ میں انہیں بہت کم وقت ملا تھا جس کے سبب انہیں بہت سی باتوں پر سمجھوتہ کرنا پڑا ۔ لیکن اس کے باوجود اگر کچھ عرصے قبل کی پاکستانی ٹیم کی انتہائی خراب کارکردگی کا موازنہ ورلڈ کپ کی کارکردگی سے کریں تو اسے تسلی بخش کہا جاسکتا ہے۔

شہناز شیخ کے خیال میں بیجنگ اولمپکس کو ذہن میں رکھتے ہوئے کم از کم چار کھلاڑیوں کی تبدیلی ناگزیر ہے جن میں کچھ سینئر کھلاڑی بھی ہیں جو اپنی خدمات پیش کرچکے ہیں اور جونیئر بھی ہیں جن کی کارکردگی مطلوبہ معیار کی نہیں تھی اور ان کھلاڑیوں کو خود بھی اس بات کا اندازہ ہے۔

شہناز شیخ غیرملکی کوچ کو غیرضروری قرار دیتے ہوئے کہتے ہیں کہ ماضی میں رولینٹ آلٹمینز کا تجربہ سب کے سامنے ہے۔ ان کے ہوتے ہوئے بھی ٹیم کی پوزیشن وہیں کی وہیں رہی۔ غیرملکی کوچ جونیئر اور نچلی سطح پر تو لایا جاسکتا ہے لیکن سینئر ٹیم کے لئے اس کی ضرورت نہیں ہے۔

شہناز شیخ کا کہنا ہے کہ ورلڈ کپ کے دوران انہوں نے تمام کھلاڑیوں کو کھیلنے کا موقع فراہم کیا اور یہ اسی کا نتیجہ ہے کہ گول کیپر ناصر احمد کا اعتماد بحال ہوا اور احسان اللہ اور زبیر کی کارکردگی بھی نمایاں طور پر سامنے آئی۔