ٹکر مارنے کے واقعے پر زیادہ تر فرانسیسی افراد کو زیدان سے ہمدردی ہے

یہ گانا انٹرنیٹ پر چلایا گیا تھا۔ اسے پروڈیوس کرنے والوں نے سب سے پہلے گانے کو اپنے ہی دوستوں کو ای میل کیا جس کے چند ہی گھنٹوں بعد انہیں میوزک انڈسٹری اور موبائل فون کمپنیوں سے لاتعداد فون کالز موصول ہونی شروع ہوگئیں۔

پیرس میں ’لا پلیگ ریکارڈز‘ سے تعلق رکھنے والے سباسچین لپزے کا کہنا ہے کہ اس ’مزاحیہ‘ گانے کا مقصد محض اپنے دوستوں کو محظوظ کرنا تھا۔

یہ گانا ورلڈ کپ فائنل میں فرانس کی اٹلی کے ہاتھوں شکست کے ایک روز بعد بنایا گیا تھا۔

فرانس میں ’زیزو‘ کے نام سے معروف ہر دلعزیز فٹ بال سٹار زیدان کو فیفا کی جانب سے اس ٹکر مارنے کی پاداش میں تین میچوں پر پابندی اور 3260 ڈالر جرمانہ کی سزا دی گئی ہے۔ دوسری جانب اٹلی کے ماتیرازی پر دو میچوں کی پابندی کے ساتھ 2170 ڈالر جرمانہ عائد کیا گیا ہے۔

سباسچین نے بتایا ہے کہ زیدان کی ٹکر پر گانا آدھے گھنٹے میں لکھ لیا گیا تھا اور ساتھ ہی 50 افراد کو ای میل بھی کردیا گیا تھا۔

اسی رات فرانسیسی ریڈیو نیٹ ورک پر کئی افراد نے یہ گانا سنا۔

گانے کے ابتدائی بول کچھ یوں ہیں: ’زیدان نے اسے ٹکر ماری، ہم نے ولڈ کپ کھو دیا‘۔

گانا پروڈیوس کرنے والوں کو سب سے اچھی پیشکش وارنر برادرز کی جانب سے کی گئی۔ ایڈوانس میں 45000 یورو اور پھر گانے کی فراخت پر ایک مخصوص رقم اور گارنٹی۔

یہ مقبول گانا 20 ممالک میں تقسیم کیا گیا اور اس کا وڈیو کلپ پیرس کے چارلٹی سٹیڈیم میں بنایا گیا۔ اس تمام کام میں دو ہفتے کا وقت لگا۔

افریقی طرز کا یہ گانا فرانس میں اس سرما کا بیسٹ ہٹ ہے۔