مناء رانا بی بی سی اردو ڈاٹ کام لاہور

	ہاکی چیمپیئنز ٹرافی سپین میں ہالینڈ نے پاکستان کو ریکارڈ نو دو سے شکست دی

پاکستان ہاکی فیڈریشن کے صدر طارق کرمانی نے ان کا استعفی منظور کر لیا ہے۔

چمپئنز ٹرافی میں ہالینڈ کے خلاف پاکستان کی ٹیم نے تاریخ کی بدترین شکست کھائی اور ہالینڈ نے پاکستان کو دو کے مقابلے نو گول سے ہرایا۔

اس بد ترین شکست کے بعد آصف باجوہ شدید تنقید کی زد میں تھے اور ورلڈ ہاکی فیڈریشن کی جانب سے تین میچز کی سزا کے باعث چمپئنز ٹرافی کے پہلے تین میچز نہ کھیل سکنے والے سابق کپتان اور سینئر کھلاڑی محمد ثقلین نے بھی آصف باجوہ پر تنقید کی اور دونوں کے درمیان تلخ کلامی کی خبریں بھی آئی ہیں۔
آصف باجوہ نے 2004 میں غیر ملکی کوچ رولینٹ اولٹمنس کے بعد پاکستان کی ٹیم کی کوچنگ سنبھالی تھی اس وقت اسسٹنٹ کوچ رانا مجاہد تھے اور ٹیم مینجر سعید خان تھے۔

اس مینجمنٹ کے تحت پاکستان کی ٹیم نے جرمنی میں ہونے والی روبو بینک ٹرافی جیتی اور کامن ویلتھ گیمز میں دوسری پوزیشن حاصل کی۔

اس کے بعد پاکستان کی ٹیم کارکردگی میں تسلسل قائم نہ رکھ سکی اور چین میں ہونے والے ورلڈ کپ کوالیفائنگ راؤنڈ میں اگرچہ ٹیم نے کوالیفائی تو کر لیا لیکن ٹیم کی کارکردگی کافی خراب رہی۔

مینجر سعید خان کو اس کارکردگی کا ذمہ دار ٹھہراتے ہوئے ہٹا دیا گیا اور ٹیم کا تمام اختیار آصف باجوہ کو سونپ دیا گیا۔ آصف باجوہ کے اسسٹنٹ کی ذمہ داری رانا ظہیر کو دی گئی جنہوں نے ایک بھی بین الاقوامی میچ نہیں کھیلا۔
اس مینجمنٹ کے تحت ٹیم ازلان شاہ ہاکی ٹورنامنٹ میں بھی کوئی کارکردگی نہ دکھا سکی اور ارجنٹائن جیسی نسبتا کمزور ٹیم سے بھی ہار گئی اس کارکردگی پر بھی آصف باجوہ پر کڑی تنقید ہوئی۔

یاد رہے کہ پاکستان ہاکی فیڈریشن کے سکریٹری برگیڈیر ریٹائرڈ مسرت اللہ خان پہلے ہی اپنے عہدے سے استعفی دے چکے ہیں اور عارضی طور پر کام کر رہے ہیں۔