مناء رانا بی بی سی اردو ڈاٹ کام، لاہور

	آسٹریلوی کھلاڑی کو ہاکی مارنے کی سزا پوری ٹیم کو بھگتنی پڑی

چھ ماہ کی اس پابندی کے دوران طارق عزیز متعدد بین الاقوامی ٹورنامنٹس سے محروم رہ جائیں گے جن میں چین میں ہونے والا ورلڈ کپ کا کوالیفائنگ راؤنڈ، ملائشیا میں ہونے والا ازلان شاہ کپ، سپین میں ہونے والی ہاکی کی چمپئنز ٹرافی، جرمنی میں منعقدہ ہیمبرگ ماسٹر اور ورلڈ کپ شامل ہیں۔

طارق عزیز نے دولت مشترکہ کھیلوں میں آسٹریلیا کے خلاف فائنل میں آسٹریلوی کھلاڑی کو ہاکی ماری تھی اور میچ ریفری نے انہیں ریڈ کارڈ دکھا کر گراؤنڈ سے باہر نکال دیا اور پاکستان کی ٹیم کو چوبیس منٹ تک دس کھلاڑیوں کے ساتھ کھیلنا پڑا۔

طارق عزیز کی اس ٹورنامنٹ میں یہ پہلی غلطی نہیں تھی۔ انہوں اس سے پہلے بھی کھیلوں میں جنوبی افریقہ کے کھلاڑی کو ہاکی ماری تھی جس پر انٹرنیشنل ہاکی فیڈریشن نے ان پر دو میچز کی پابندی لگائی تھی اور وہ ٹرینیڈاڈ اینڈ ٹوباگو اور ملائشیا کے خلاف میچ نہیں کھیل سکے تھے۔

آسٹریلیا کے خلاف پھر وہی حرکت کرنے پر پاکستان ہاکی فیڈریشن نے انٹرنیشنل ہاکی فیڈریشن کو یقین دلایا تھا کہ وہ طارق عزیز کے خلاف خود کاروائی کریں گے۔

ہار برداشت نہیں ہوتی  جب پاکستان ہار رہا ہوتا ہے تو مجھ سے برداشت نہیں ہوتا اور نا چاہتے ہوئے بھی مجھ سے اس قسم کی حرکت ہو جاتی ہے فارورڈ طارق عزیز

بریگیڈئر مسرت اللہ نے کہا کہ طارق عزیز کے اس عمل سے ملک کے وقار کو دھچکا پہنچا ہے۔

انہوں نے کہا کہ اس سلسلے میں فارورڈ کا مؤقف جاننے یا کسی مزید گواہی اور ویڈیو فلم کی ضرورت نہیں تھی۔

انہوں نے کہا کہ طارق عزیز ماضی میں بھی ایسی حرکتیں کرتے رہے ہیں لیکن فائنل میں دو وزرائے اعظم کی موجودگی میں ایسی حرکت بہت شرمندگی کی بات ہے۔ انہوں نے کہا کہ مجھے تو یاد نہیں کہ کبھی کسی ہاکی فائنل کو دو وزرائے اعظم نے دیکھا ہو۔

ورلڈ کپ کوالیفائنگ راؤنڈ کے لیے پاکستان کی ہاکی ٹیم کے حتمی اعلان کی بابت انہوں نے کہا کہ وقت کی کمی کو پیش نظر رکھتے ہوئے ورلڈ کپ کوالیفائنگ راؤنڈ کے لیے اٹھارہ رکنی قومی ٹیم کا اعلان اتوار تک کر دیا جائے گا تاکہ ویزہ اور دیگر امور آسانی سے طے پا جائیں۔

ادھر فارورڈ طارق عزیز نے کہا کہ انہیں سزا منظور ہے۔ انہوں نے کہا کہ اس واقعے کے بعد انہیں خود ایسی سزا کی توقع تھی۔

طارق عزیز نے کہا کہ وہ اچھے رویے کی کوشش تو کرتے ہیں لیکن جب پاکستان ہار رہا ہوتا ہے تو ان سے برداشت نہیں ہوتا اور وہ نا چاہتے ہوئے بھی اس قسم کی حرکت کر جاتے ہیں۔

انہوں نے کہا کہ ’مجھے اپنی اس بیوقوفی پر افسوس ہے‘۔