عبدالرشید شکور بی بی سی اردو ڈاٹ کام، کولمبو

	انضمام الحق شعیب ملک کی صلاحیتوں کے معترف رہے ہیں

انضمام الحق کے مطابق چوتھی اننگز کا اپنا دباؤ ہوتا ہے اور پھر رنز کا ہدف بھی بڑا تھا اس صورتحال میں دوسری اننگز کی کارکردگی غیرمعمولی رہی۔

پاکستان کرکٹ ٹیم کے کپتان کا کہنا ہے کہ وکٹ پر گیند نیچے رہ رہی تھی۔

انہوں نے شعیب ملک اور فیصل اقبال کو صرف یہ ہدایت کی تھی کہ وکٹ پر ٹھہرنا ہے انہیں خوشی ہے کہ ان دونوں نے اس پر عمل کیا۔ کھانے کے وقفے پر جب وکٹ نہیں گری تو انہیں یقین ہوچلا تھا کہ ان کی ٹیم اس میچ کو ڈرا کرجائے گی۔

انضمام الحق شعیب ملک کی صلاحیتوں کے ہمیشہ سے معترف رہے ہیں۔

	شعیب نے اس میچ میں بڑی عمدہ بیٹنگ کا مظاہرہ کیا

انضمام الحق کے مطابق شعیب ملک بنیادی طور پر اوپنر نہیں تھے لیکن ٹیم کے مفاد میں وہ اوپننگ بیٹسمین کے طور پر کھیلے اور اب ان کی بیٹنگ میں پختگی آتی جارہی ہے جو ٹیم کے لیئے خوش آئند بات ہے۔

انضمام الحق کا کہنا ہے کولمبو ٹیسٹ میں پاکستانی ٹیم کی مجموعی کارکردگی سے وہ مطمئن ہیں۔

ٹیم میں محمد یوسف کی ممکنہ واپسی اور فیصل اقبال کے ساتھ ان کے تقابل پر انضمام الحق کا کہنا تھا کہ محمد یوسف بلاشبہ ورلڈ کلاس بیٹسمین ہیں جہاں تک فیصل اقبال کی کارکردگی کا تعلق ہے تو اس سے یہ پتہ چلتا ہےکہ ٹیم میں مسابقت کا جذبہ ہے اور مقابلے کی فضا ہے۔

شعیب ملک کا 148 رنز کی شاندار اننگز پر کہنا تھا کہ یہ ان کی توجہ کے ساتھ ساتھ ٹیم کے کپتان کی ہدایت کا نتیجہ ہے۔

شعیب ملک کہتے ہیں کہ انہوں نے بیٹنگ پر ضرور توجہ رکھی ہے لیکن اپنی بولنگ سے غافل نہیں ہوئے ہیں۔

بھارت کے خلاف ون ڈے سیریز میں تین شاندار اننگز کے بعد مایوس کن کارکردگی کے حوالے سے ایک سوال پر شعیب کا کہنا تھا کہ خود پر دباؤ طاری کرنے سے پرفارمنس مزید خراب ہوتی چلی جاتی ہے۔ انہیں یقین تھا کہ وہ ایک بڑی اننگز سے اعتماد بحال کرنے میں کامیاب ہوجائیں گے۔